سعوی عرب، حج کے دوران فوری ردعمل کو تیز کرنے کے لیے فیلڈ اسسٹنس کے منصوبے فعال

مکہ مکرمہ۔25مئی (اے پی پی):سعوی عرب نے حج کے دوران فوری ردعمل کو تیز کرنے کے لیے فیلڈ اسسٹنس کے منصوبے فعال کر دیئے ہیں۔ العربیہ اردو کے مطابق شہری دفاع کی حج ایمرجنسی فورسز 1447ھ کے سیزن کے لیے فیلڈ اسسٹنس کے منصوبوں پر عمل درآمد کر رہی ہیں، فورسز فوری ردعمل کی صلاحیت کو مضبوط بنانے کے لیے تمام انسانی اور مشینی وسائل کو بروئے کار لا رہی ہیں۔ ان اقدامات کا مقصد دارالحکومت اور مشاعر مقدسہ میں ضیوف الرحمن کے لیے تحفظ کے معیار کو بلند کرنا ہے۔یہ کوششیں ایک مربوط آپریشنل سسٹم کا حصہ ہیں جو سیزن کے دوران فیلڈ کی تیاری اور متعلقہ اداروں کے درمیان فوری ہم آہنگی پر انحصار کرتا ہے۔ایمرجنسی فورسز کے فرائض کا مقصد ضرورت کے وقت استعمال کے لیے تیز رفتار رسائی کے راستوں کا تعین کرنا اور مشاعر مقدسہ و مکہ مکرمہ میں شہری دفاع کی فورسز کے امدادی کاموں کو منظم کرنا ہے تاکہ ہنگامی حالات سے نمٹنے کی کارکردگی کو بڑھایا جا سکے۔

ان فرائض میں خطرناک مواد سے نمٹنے والی ٹیموں اور یونٹس، سعودی سرچ اینڈ ریسکیو ٹیم، واٹر اینڈ ماؤنٹین ریسکیو یونٹس کے ساتھ ساتھ فیلڈ آپریشنز کی معاونت کے لیے مخصوص کوئیک ریسپانس یونٹس کی نگرانی بھی شامل ہے۔حج کے دوران شہری دفاع کی فورسز کمانڈ اینڈ کنٹرول روم کے ذریعے مشاعر مقدسہ کے اندر فیلڈ کارکردگی کے اشاریوں کی نگرانی کرتی ہیں تاکہ سکیورٹی اور فائر پروٹیکشن سسٹم کی کارکردگی کو یقینی بنایا جا سکے اور اس کے ساتھ ساتھ سول پروٹیکشن ٹیموں کی جانب سے کی جانے والی رصد و نگرانی کی سرگرمیوں کا جائزہ لیا جا سکے۔ڈائریکٹوریٹ نے اس بات پر زور دیا ہے کہ کارکردگی کے اشاریوں کا یہ نظام ماہر انسانی وسائل کی نگرانی میں اور مختلف متعلقہ اداروں کے ساتھ مکمل یکجہتی کے ساتھ کام کرتا ہے، جس کا مقصد شہری دفاع کے کاموں کی کارکردگی کو بڑھانا اور حج سیزن کے دوران ضیوف الرحمن کے لیے تحفظ اور سلامتی کے اعلیٰ ترین معیار کو یقینی بنانا ہے۔