ماحولیاتی چیلنجز سے نمٹنے اور قدرتی وسائل کے تحفظ کیلئے اجتماعی اور مستقل اقدامات کی ضرورت ہے ، چیئرمین سینیٹ

اسلام آباد۔4جون (اے پی پی):چیئرمین سینیٹ سید یوسف رضا گیلانی نے ماحولیاتی چیلنجز سے نمٹنے اور قدرتی وسائل کے تحفظ کے لئے اجتماعی اور مستقل اقدامات کی فوری ضرورت پر زور دیا ہے تاکہ آنے والی نسلوں کے لئے ایک محفوظ اور پائیدار ماحول یقینی بنایا جا سکے۔عالمی یومِ ماحولیات(5 جون) کے موقع پر اپنے پیغام میں چیئرمین سینیٹ نے کہا کہ ماحولیاتی آلودگی، موسمیاتی تبدیلی، جنگلات کی کٹائی، پانی کی قلت، فضائی و ماحولیاتی آلودگی اور حیاتیاتی تنوع میں کمی نہ صرف ماحولیاتی نظام بلکہ پائیدار ترقی، عوامی صحت، غذائی تحفظ اور اقتصادی استحکام کے لئے بھی سنگین خطرات پیدا کر رہے ہیں۔ انہوں نے کہا کہ پاکستان اگرچہ عالمی کاربن اخراج میں نہایت محدود کردار رکھتا ہے تاہم موسمیاتی تبدیلیوں سے متاثر ہونے والے ممالک میں شامل ہے۔

سید یوسف رضا گیلانی نے ماحول دوست پالیسیوں کے فروغ اور معاشرے کے ہر سطح پر پائیدار طرزِ عمل اپنانے کی اہمیت پر زور دیتے ہوئے کہا کہ ماحول کا تحفظ ایک مشترکہ ذمہ داری ہے جس کے لئے حکومت، اداروں اور ہر فرد کو اپنا کردار ادا کرنا ہوگا۔چیئرمین سینیٹ نے ماحولیاتی تحفظ کے حوالے سے آگاہی بڑھانے، قدرتی وسائل کے مؤثر استعمال، شجرکاری مہمات، صاف توانائی کے فروغ اور ویسٹ مینجمنٹ کی ضرورت پر زور دیا۔

عالمی یومِ ماحولیات کے موقع پر سید یوسف رضا گیلانی نے بالخصوص نوجوانوں پر زور دیا کہ وہ درخت لگانے، آلودگی میں کمی، پانی کے تحفظ، اور روزمرہ زندگی میں ماحول دوست طرزِ عمل اپنانے جیسے عملی اقدامات کے ذریعے ماحول کے تحفظ میں فعال کردار ادا کریں۔انہوں نے ایک سرسبز، خوشحال اور ماحولیاتی طور پر محفوظ پاکستان کے لئے ماحولیاتی پائیداری اور موسمیاتی استحکام سے متعلق پالیسیوں اور اقدامات کی حمایت جاری رکھنے کے سینیٹِ پاکستان کے عزم کا اعادہ بھی کیا۔