چین کے مختلف اقتصادی شعبوں میں مئی کے دوران مثبت پیش رفت برقرار

بیجنگ ۔9جون (اے پی پی):چین کے مختلف اقتصادی شعبوں میں رواں سال مئی کے دوران مثبت پیش رفت برقرار رہی اور بندرگاہی رسد و ترسیل کی مانگ مستحکم ریکارڈ کی گئی۔ سی جی ٹی این کے مطابق نیشنل ڈویلپمنٹ اینڈ ریفارم کمیشن کے تحت قومی انفارمیشن سینٹر کی جانب سے جاری کردہ اعدادوشمار میں بتایا گیا ہے کہ مئی کے دوران جامع معاشی پالیسیوں کے باہمی اثرات کے نتیجے میں معیشت کے مختلف شعبوں میں مستحکم اور مثبت ترقی کا رجحان برقرار رہا۔تازہ ترین اعداد و شمار سے پتہ چلتا ہے کہ مئی میں ملک بھر کی بندرگاہوں میں آلات و مشینری کے استعمال کی شرح میں گزشتہ سال کے مقابلے میں تقریباً 9 فیصد پوائنٹس کا اضافہ ہوا، بندرگاہی رسد و ترسیل کی مانگ مسلسل مضبوط رہی، جس سے ظاہر ہوتا ہے کہ بیرونی تجارت کی لچک اور استحکام مزید مضبوط ہوا ہے۔مئی میں تاجروں کی کاروباری سرگرمیوں کا اشاریہ لگاتار تیسرے مہینے بہتر ہوا، جس میں الیکٹرانک اشیاء، کھانے پینے، نقل و حمل اور سفر جیسے اہم صارفی شعبوں میں نمایاں اضافہ دیکھنے میں آیا۔اسی عرصے میں مصنوعی ذہانت اور ہیومنائیڈ روبوٹکس جیسے جدید شعبوں میں سرمایہ کاری کے حجم میں گزشتہ سال کے مقابلے میں تقریباً پانچ گنا اضافہ ہوا۔ اس کے ساتھ ساتھ چین کی اسٹریٹجک ابھرتی ہوئی صنعتوں سے متعلق منظور شدہ پیٹنٹس کی تعداد میں گزشتہ سال کے مقابلے میں 19.7 فیصد اضافہ ہوا جس سے ظاہر ہوتا ہے کہ اختراعی کامیابیاں تیزی سے حقیقی پیداواری قوت میں تبدیل ہو رہی ہیں۔