اقوامِ متحدہ میں سعودی عرب کا ذمہ دارانہ اے آئی طرزِ حکمرانی پر زور

ریاض ۔21جون (اے پی پی):سعودی عرب نے بین الاقوامی تعاون کو مضبوط بنانے کی اہمیت کا اعادہ کیا تاکہ مصنوعی ذہانت کا ذمہ دارانہ استعمال یقینی ہو اور پائیدار ترقی میں پیش رفت کے لیے اس کی صلاحیتوں کو بروئے کار لایا جائے۔العربیہ کے مطابق نیو یارک میں اے آئی پر آزاد بین الاقوامی سائنسی پینل کے شریک سربراہان کے ساتھ اقوامِ متحدہ کی جنرل اسمبلی کے انٹرایکٹو ڈائیلاگ کے دوران مملکت نے عرب گروپ کی جانب سے ایک بیان دیا۔اقوامِ متحدہ میں سعودی عرب کے مستقل نمائندہ عبدالعزیز الواصل کے ایک بیان میں مملکت نے گلوبل ڈیجیٹل کمپیکٹ نافذ کرنے اور اے آئی پر آزاد پینل کے قیام کی کوششوں کا خیرمقدم کیا۔سعودی سفیر نے حکومتوں، اقوامِ متحدہ، نجی شعبے، تعلیمی اداروں اور سول سوسائٹی کے درمیان مسلسل بات چیت اور تعاون کی اہمیت کو بھی نمایاں کیا۔انہوں نے زور دیا کہ رکن ممالک کو مستقبل کے اے آئی طرزِ حکمرانی کے کسی بھی میکانزم میں مرکزی کردار ادا کرنا چاہیے جبکہ قومی پالیسیاں بنانے کے لیے ہر ملک کے خود مختار حق کا احترام کیا جائے جو اس کی ترقی کی ترجیحات اور ضروریات کے مطابق ہو۔