’’مصنوعی ذہانت برائے فلاح‘‘ کے موضوع پر عالمی سربراہی کانفرنس سوئٹزرلینڈ کے شہر جنیوا میں جاری

جنیوا۔10جولائی (اے پی پی):بین الاقوامی ٹیلی کمیونیکیشن یونین اور اقوام متحدہ کے متعدد اداروں کے اشتراک سے 8 سے 11 جولائی تک منعقد ہونے والی عالمی سربراہی کانفرنس ’’مصنوعی ذہانت برائے فلاح‘‘ سوئٹزرلینڈ کے شہر جنیوا میں جاری ہے ۔ سی جی ٹی این کے مطابق سربراہی کانفرنس کے دوران خصوصی دعوت پر چائنا میڈیا گروپ کا سپیشل پروگرام ’’اے آئی پلس میں کامیابی‘‘پیش کیا جا رہا ہے، جس میں خصوصی انٹرویوز، آن سائٹ رپورٹس اور مختلف سرگرمیوں کے ذریعے مصنوعی ذہانت کی جدت اور ترقی کی تازہ کامیابیوں کو اجاگر کیا جا رہا ہے۔ بین الاقوامی ٹیلی کمیونیکیشن یونین کے ٹیلی کام سٹینڈرڈائزیشن بیورو کے ڈپٹی ڈائریکٹر اور ریسرچ گروپ اور پالیسی ڈیپارٹمنٹ کے سربراہ بلال جاموسی نے چائنا میڈیا گروپ کو انٹرویو دیتے ہوئے کہا کہ مصنوعی ذہانت کے شعبے میں چین دنیا کے صفِ اول کے ممالک میں شامل ہے۔انہوں نے کہا کہ اس کا واضح ثبوت اس عالمی سربراہی کانفرنس اور دنیا بھر میں پیش کیے جانے والے مختلف جدید حل ہیں، جن میں روبوٹس کے شعبے میں ایمبوڈیڈ انٹیلی جنس، ذہین خودکار نظام، چیٹ بوٹس، بڑے لینگویج ماڈلز کے ساتھ تعامل اور طبی سہولیات، تعلیم اور زراعت سمیت ڈیجیٹل ٹیکنالوجی کے مختلف شعبوں میں مصنوعی ذہانت کے وسیع استعمال شامل ہیں۔