بچوں میں غذائیت اور صحت مند طرز زندگی کے فروغ کے لیے وفاقی وزارت تعلیم و پیشہ ورانہ تربیت اور نیسلے پاکستان کے دو خطوط مفاہمت پر دستخط

اسلام آباد۔18جولائی (اے پی پی):وفاقی وزارت تعلیم و پیشہ ورانہ تربیت نے نیسلے پاکستان اور فیڈرل ڈائریکٹوریٹ آف ایجوکیشن ( ایف ڈی ای ) اور نیسلے پاکستان اور ڈائریکٹوریٹ جنرل آف سپیشل ایجوکیشن ( ڈی جی ایس ای )کے درمیان بچوں میں غذائیت کی تعلیم اور صحت مند طرز زندگی کو فروغ دینے کے لیے دو خطوط مفاہمت پر دستخط کی تقریب کی میزبانی کی۔ وزارت تعلیم و پیشہ وارانہ تربیت کی جانب سے جاری اعلامیہ کے مطابق تقریب میں سیکرٹری وزارت وفاقی تعلیم اور پیشہ ورانہ تربیت ندیم محبوب، وزارت کے سینئر حکام، کارپوریٹ امور اور پائیداری کے سربراہ شیخ وقار احمد، منیجر کارپوریٹ افیئرز زائرہ احمد اور نیسلے پاکستان ٹیم کے اراکین نے شرکت کی۔نیسلے کے صحت من بچے کے اقدام کے تحت یہ شراکت داری غذائیت سے متعلق آگاہی، صحت مند کھانے، ہائیڈریشن، حفظان صحت، جسمانی سرگرمی اور فضلہ کے ذمہ دارانہ انتظام کو فروغ دے گی۔ ایف ڈی ای کے ساتھ تعاون کا مقصد 300 اساتذہ کو تربیت دینا اور وفاقی سرکاری سکولوں میں تقریباً 10,000 طلباء کو فائدہ پہنچانا ہے۔ڈی جی ایس ای کے ساتھ شراکت داری 200 فیکلٹی ممبران، تھراپسٹ اور کثیر الضابطہ پیشہ ور افراد کو تربیت دے گی جو تقریباً 2,000 خصوصی ضروریات والے بچوں تک رسائی حاصل کریں گے۔جس میں سیکھنے کے مواد کی ترقی اور مخصوص وسائل کے کمروں کا قیام بھی شامل ہے۔اس موقع پر خطاب کرتے ہوئے سیکرٹری ندیم محبوب نے تعاون کو سراہا اور بچوں کی صحت، بہبود اور سیکھنے کے نتائج کو بہتر بنانے کے لیے پبلک پرائیویٹ پارٹنرشپ کی اہمیت پر زور دیا۔نیسلے پاکستان کے کارپوریٹ امور کے سربراہ شیخ وقار احمد نے کہا کہ یہ شراکتیں تعلیم کے ذریعے بچوں کی صحت اور بہبود کو بہتر بنانے کے لیے ہمارے مشترکہ عزم کی عکاسی کرتی ہیں۔ عوامی اداروں کے ساتھ مل کر کام کرنے سے، ہم اساتذہ کو بااختیار بنا سکتے ہیں، صحت مند انتخاب کی ترغیب دے سکتے ہیں اور آنے والی نسلوں کے لیے دیرپا مثبت اثرات مرتب کر سکتے ہیں۔