چین کے قومیتی اتحاد و ترقی کے فروغ کے قانون سے متعلق فلپائنی بیان جھوٹے الزامات سے بھرپور ہے، چینی وزارت خارجہ

بیجنگ۔5اگست (اے پی پی):چین نے کہا ہے کہ فلپائن کی وزارتِ دفاع کا چین کے قومیتی اتحاد و ترقی کے فروغ کے قانون سے متعلق بیان جھوٹ اور بدنیتی پر مبنی الزامات سے بھرپور ہے۔

سی جی ٹی این کے مطابق یہ بات چین کی وزارتِ خارجہ کے ترجمان لین جیان نے فلپائن کی وزارتِ دفاع کی جانب سے چین کے قومیتی اتحاد و ترقی کے فروغ کے قانون سے متعلق بیان پر ردعمل دیتے ہوئے کہی۔ چینی ترجمان نے کہا کہ مذکورہ بیان جھوٹ اور بدنیتی پر مبنی الزامات سے بھرپور ہے، چین کے اندرونی معاملات میں مداخلت ہے اور انتہائی سنگین نوعیت کی سیاسی اشتعال انگیزی ہے جس کی چین شدید مخالفت کرتا ہے۔ ترجمان نے کہا کہ فلپائن میں چین مخالف عناصر کا ایک محدود گروہ اپنے سیاسی مفادات کے حصول اور بحری امور میں فلپائن کی خلاف ورزیوں پر پردہ ڈالنے کے لیے سیاسی اور ابلاغی ہتھکنڈے استعمال کر رہا ہے اور حقائق کو مسخ کرنے کی کوشش کر رہا ہے، تاہم ان کے عزائم کبھی کامیاب نہیں ہوں گے۔ انہوں نے کہا کہ چین ایک بار پھر ان عناصر کو خبردار کرتا ہے کہ وہ اشتعال انگیزی اور چین کے خلاف بے بنیاد الزامات عائد کرنا بند کریں، بصورت دیگر انہیں اپنے منفی اقدامات کی قیمت چکانا پڑے گی۔ ترجمان نے کہا کہ قومیتی اتحاد و ترقی کے فروغ کے قانون کا نفاذ مختلف قومیتوں کے قانونی حقوق و مفادات کے بہتر تحفظ کے لیے مفید ہے اور یہ قومیتی اتحاد و ترقی کے فروغ کے لیے مضبوط قانونی ضمانت فراہم کرے گا۔