"چیئرمین پاکستان ریلویز سید مظہر علی شاہ کی زیرِ صدارت ایم ایل ون منصوبے سے متعلق اہم اجلاس منعقد ہوا، جس میں بین الاقوامی ڈیزائن و ریویو کنسلٹنٹس اور پاکستان ریلویز کے اعلیٰ افسران نے شرکت کی۔”
چیئرمین پاکستان ریلویز کی زیرِ صدارت ایم ایل ون منصوبہ بارے اہم اجلاس
لاہور۔15اگست (اے پی پی):چیئرمین پاکستان ریلویز سید مظہر علی شاہ کی زیرِ صدارت ایم ایل ون منصوبے سے متعلق اہم اجلاس منعقد ہوا،جس میں بین الاقوامی ڈیزائن کنسلٹنٹس، ریویو کنسلٹنٹس اور پاکستان ریلویز کے اعلیٰ افسران نے شرکت کی۔
اجلاس میں کراچی تا روہڑی سیکشن کی اپ گریڈیشن سے متعلق مختلف امور کا تفصیلی جائزہ لیا گیا اور منصوبے کی تیاری، پیش رفت وآئندہ اقدامات پر مشاورت کی گئی۔چیئرمین پاکستان ریلویز نے ایم ایل ون منصوبے سے متعلق ریویو فیز 30 اکتوبر 2026 تک مکمل کرنے کی ہدایت کرتے ہوئے منصوبے پر پیش رفت کی مسلسل نگرانی اور ہفتہ وار بنیادوں پر جائزہ لینے کی بھی ہدایت کی۔اجلاس میں ایم ایل ون منصوبے کے لیے مارکیٹ سے مشاورت کے دوسرے مرحلے کا 8 ستمبر 2026 سے آغاز کرنے کا فیصلہ کیا گیا۔ دوسرے مرحلے میں منصوبے کی تیاری، تکنیکی امور اور آئندہ کے لائحہ عمل پر مارکیٹ کے ماہرین اور متعلقہ اسٹیک ہولڈرز سے تفصیلی مشاورت کی جائے گی۔ترجمان کے مطابق پاکستان ریلویز ایم ایل ون منصوبے کو مزید موثر،جدید اور قابلِ عمل بنانے کے لیے مارکیٹ کی تجاویز، بین الاقوامی تجربات اور ماہرین کی آرا سے بھرپور استفادہ کرے گا۔منصوبے کی تیاری اور عمل درآمد کے تمام مراحل میں میرٹ، شفافیت اور مسابقت کے اصولوں کو ہر صورت یقینی بنایا جائے گا۔وفاقی وزیر ریلوے محمد حنیف عباسی نے ایم ایل ون منصوبے پر ہونے والی پیش رفت پر اطمینان کا اظہار کرتے ہوئے کہا ہے کہ ایم ایل ون پاکستان ریلویز کی ترقی، جدید نظام اور مستقبل کی ضروریات کو پورا کرنے کی بنیاد ہے۔ منصوبے کی اپ گریڈیشن سے ٹرینوں کی رفتار، مسافروں کو فراہم کی جانے والی سہولیات اور پاکستان ریلویز کی مجموعی کارکردگی میں نمایاں بہتری آئے گی۔
