اقوام متحدہ کا عالمی یومِ انسانی ہمدردی پر عالمی برادری سے انسانیت کے لیے عملی اقدامات کا مطالبہ

اقوام متحدہ ۔19اگست (اے پی پی):اقوام متحدہ نے عالمی یومِ انسانی ہمدردی (World Humanitarian Day)کے موقع پردنیا بھر میں بحرانوں سے متاثرہ لاکھوں افراد کو زندگی بچانے والی امداد فراہم کرنے والے انسانی امدادی کارکنوں کو خراجِ تحسین پیش کرتے ہوئے کہا ہے کہ گزشتہ تین سال کے دوران ایک ہزار سے زائد امدادی کارکن ہلاک ہو چکے ہیں، جبکہ متعدد دیگر فائرنگ، گولہ باری، بمباری، اغوا اور زیادتی جیسے واقعات کا نشانہ بننے سے بال بال بچے ہیں۔اماراتی نیوز ایجنسی وام کے مطابق اقوام متحدہ کے سیکرٹری جنرل انتونیو گوتریش نے عالمی یومِ انسانی ہمدردی کے موقع پر اپنے پیغام میں کہاکہ دنیا نے وعدے کیے ہیں۔ اب اسے عمل کرنا ہوگا، جنگ کے اصولوں کا احترام کیا جائے، محفوظ رسائی کو یقینی بنایا جائے، ذمہ داروں کا احتساب کیا جائے اور مناسب وسائل فراہم کیے جائیں۔انہوں نے کہاکہ انسانی امدادی کارکن ضرورت مندافراد کے لیے آواز اٹھاتے ہیں۔ ہمیں بھی ان کے لیے آواز اٹھانی چاہیے۔ ہمیں انسانیت کے لیے اب عمل کرنا ہوگا۔یاد رہے کہ عالمی یومِ انسانی ہمدردی ہر سال 19 اگست کو منایا جاتا ہے۔ یہ دن عراق کے شہر بغداد میں اقوام متحدہ کے ہیڈکوارٹر پر 2003 میں ہونے والے بم دھماکے کی برسی کے موقع پر منایا جاتا ہے۔