چیئرمین سی ڈی اے و چیف کمشنر اسلام آباد کا سیکٹر C-14 اور سنگجانی انٹرچینج کا تفصیلی دورہ

اسلام آباد۔2ستمبر (اے پی پی):چیئرمین کیپیٹل ڈویلپمنٹ اتھارٹی (سی ڈی اے) و چیف کمشنر اسلام آباد نے سیکٹر C-14 اور سنگجانی انٹرچینج کا تفصیلی دورہ کیا اور دونوں مقامات پر جاری ترقیاتی و تعمیراتی سرگرمیوں، منصوبوں کی رفتار، معیار اور تکمیل کے حوالے سے پیش رفت کا موقع پر جائزہ لیا۔

اس موقع پر ممبر بلڈنگ، ممبر اسٹیٹ، ممبر ایڈمن، ڈائریکٹر جنرل ورکس، ڈائریکٹر جنرل انفراسٹرکچر، چیف آفیسر میٹروپولیٹن کارپوریشن اسلام آباد، ڈپٹی کمشنر اسلام آباد اور دیگر متعلقہ سینئر افسران بھی ان کے ہمراہ تھے۔دورہ سیکٹر C-14 کے دوران متعلقہ سینئر افسران نے چیئرمین سی ڈی اے و چیف کمشنر اسلام آباد کو سیکٹر میں جاری اور مکمل ہونے والے ترقیاتی کاموں کے حوالے سے تفصیلی بریفنگ دی۔ بریفنگ میں بتایا گیا کہ سیکٹر C-14 میں بنیادی انفراسٹرکچر کا کام مکمل کر لیا گیا ہے جبکہ بجلی کی فراہمی سے متعلق کام بھی آخری مراحل میں داخل ہو چکا ہے۔

متعلقہ حکام نے بتایا کہ سیکٹر C-14 کی مرکزی شاہراہوں پر لائٹ پولز کی تنصیب کا کام مکمل کر لیا گیا ہے جبکہ شاہراہوں اور گلیوں میں سائن بورڈز کی تنصیب بھی مکمل کی جا چکی ہے۔ اسی طرح مرکزی شاہراہوں پر لینڈ سکیپنگ اور ہارٹیکلچر کا کام تیزی سے جاری ہے جس کا مقصد سیکٹر کو جدید، خوبصورت اور شہریوں کے لیے بہتر رہائشی ماحول فراہم کرنا ہے۔بریفنگ میں مزید بتایا گیا کہ سیکٹر C-14 میں ترقیاتی کاموں کی تکمیل کے بعد ڈویلپڈ پلاٹس کا قبضہ الاٹیز کے حوالے کرنے کا باقاعدہ آغاز کر دیا گیا ہے۔ باقی ماندہ الاٹیز کو ان کے پلاٹس کے پوزیشن فراہم کرنے کا عمل بھی جاری ہے تاکہ شہریوں کو غیر ضروری دفتری مراحل اور مشکلات سے بچایا جا سکے۔

چیئرمین سی ڈی اے و چیف کمشنر اسلام آباد نے متعلقہ افسران کو ہدایت کی کہ سیکٹر C-14 کی ڈویلپمنٹ سے متعلق باقی ماندہ تمام امور کو بھی ترجیحی بنیادوں پر مکمل کیا جائے اور سیکٹر ڈویلپمنٹ میں حائل تمام رکاوٹوں کو فوری طور پر دور کیا جائے۔انہوں نے کہا کہ وزیراعظم پاکستان اور وفاقی وزیر داخلہ کی ہدایت پر اسلام آباد میں شہریوں کی رہائشی ضروریات پوری کرنا سی ڈی اے کی اولین ترجیحات میں شامل ہے۔ اسلام آباد کی تعمیر و ترقی کے لیے میگا پراجیکٹس کے ساتھ ساتھ نئے رہائشی سیکٹرز کی بروقت ڈویلپمنٹ بھی انتہائی اہم ہے۔چیئرمین سی ڈی اے نے مزید کہا کہ شہریوں کو ان کے پلاٹس کا قبضہ جلد از جلد حوالے کرنے کو یقینی بنایا جائے گا اور اس سلسلے میں تمام ضروری انتظامی و فنی اقدامات کو مزید تیز کیا جارہا ہے۔

انہوں نے واضح کیا کہ سی ڈی اے کے اقدامات اسلام آباد میں شہریوں کی بڑھتی ہوئی رہائشی ضروریات پوری کرنے اور انہیں بہتر شہری سہولیات فراہم کرنے میں معاون ثابت ہوں گے۔انہوں نے ہدایت کی کہ باقی ماندہ پلاٹس کے حوالے سے تمام ضروری کارروائی مزید تیز کی جائے اور الاٹیز کو بروقت سہولت فراہم کی جائے۔ انہوں نے کہا کہ ترقیاتی منصوبوں کا مقصد صرف انفراسٹرکچر کی تکمیل نہیں بلکہ شہریوں کو عملی طور پر بہتر رہائشی سہولیات کی فراہمی ہے، اس لیے منصوبوں کی تکمیل کے بعد قبضہ اور دیگر متعلقہ امور میں غیر ضروری تاخیر برداشت نہیں کی جائے گی۔بعد ازاں چیئرمین سی ڈی اے و چیف کمشنر اسلام آباد نے سنگجانی انٹرچینج کا بھی دورہ کیا جہاں انہوں نے جاری تعمیراتی و ترقیاتی کاموں کا موقع پر تفصیلی معائنہ کیا۔ انہوں نے منصوبے کے مختلف حصوں کا جائزہ لیتے ہوئے ترقیاتی کاموں کی رفتار، معیار اور فیلڈ میں جاری سرگرمیوں کا مشاہدہ کیا۔متعلقہ افسران نے چیئرمین سی ڈی اے کو سنگجانی انٹرچینج پر جاری کاموں، تعمیراتی پیش رفت اور منصوبے کی تکمیل کے حوالے سے تفصیلی بریفنگ دی۔

چیئرمین سی ڈی اے نے منصوبے پر کام کی رفتار کو مزید تیز کرنے اور مقررہ اہداف کے مطابق بروقت تکمیل یقینی بنانے کی ہدایت کی۔انہوں نے ہدایت کی کہ تمام ترقیاتی منصوبوں میں معیار پر کسی قسم کا سمجھوتہ نہ کیا جائے اور تعمیراتی کاموں کی مسلسل فیلڈ مانیٹرنگ کو مزید موثر بنایا جائے۔ انہوں نے کہا کہ ترقیاتی منصوبوں کی بروقت تکمیل کے ساتھ ساتھ تعمیراتی معیار، پائیداری اور شہریوں کو بہتر سہولیات کی فراہمی اولین ترجیح ہونی چاہیے۔چیئرمین سی ڈی اے نے متعلقہ افسران کو ہدایت کی کہ جاری منصوبوں کی باقاعدگی سے نگرانی کی جائے، فیلڈ میں موجود مسائل کو فوری طور پر حل کیا جائے اور تمام متعلقہ محکمے باہمی رابطے کے ساتھ کام کریں تاکہ ترقیاتی منصوبوں کی رفتار میں کسی قسم کی رکاوٹ پیدا نہ ہو۔

انہوں نے کہا کہ اسلام آباد کی تعمیر و ترقی ایک مسلسل عمل ہے اور سی ڈی اے شہریوں کو جدید انفراسٹرکچر، بہتر رہائشی سہولیات، خوبصورت ماحول اور موثر شہری خدمات فراہم کرنے کے لیے تمام دستیاب وسائل بروئے کار لا رہا ہے۔چیئرمین سی ڈی اے نے اس عزم کا اظہار کیا کہ اسلام آباد میں جاری میگا پراجیکٹس کے ساتھ ساتھ سیکٹر ڈویلپمنٹ، انفراسٹرکچر کی بہتری، رہائشی سہولیات کی فراہمی اور شہریوں کے مسائل کے فوری حل پر بھی بھرپور توجہ جاری رکھی جائے گی۔