کپتان لاہور قلندر کی نوجوان کھلاڑیوں سے ملاقات

لاہور۔3اکتوبر (اے پی پی):کپتان لاہور قلندر شاہین شاہ آفریدی کی نوجوان کھلاڑیوں سے خصوصی ملاقات ہوئی، جس میں انہوں نے ان کھلاڑیوں سے گفتگو کی جو ڈومیسٹک سیزن کے لیے زمبابوے کا سفر کرنے والی ٹیم میں منتخب ہوئے ہیں۔ ملاقات کے دوران شاہین شاہ آفریدی نے نوجوان کرکٹرز کو اپنے تجربات سے آگاہ کیا اور انہیں بین الاقوامی کرکٹ کے تقاضوں، کھیل کے دوران دبائو سے نمٹنے اور اپنی صلاحیتوں پر بھرپور اعتماد رکھنے کے حوالے سے قیمتی مشورے دیئے۔ انہوں نے نوجوان کھلاڑیوں کی حوصلہ افزائی کرتے ہوئے کہا کہ زمبابوے کا دورہ ان کے لیے اپنی صلاحیتیں منوانے اور سیکھنے کا ایک اہم موقع ہے۔

انہوں نے کھلاڑیوں کو محنت، نظم و ضبط اور کھیل پر بھرپور توجہ مرکوز رکھنے کی تلقین کی اور اس موقع سے زیادہ سے زیادہ فائدہ اٹھانے پر زور دیا۔خصوصی نشست کے دوران نوجوان کھلاڑیوں نے بھی شاہین شاہ آفریدی سے گفتگو کی اور ان کے تجربات سے استفادہ کیا۔ شاہین کی جانب سے دی جانے والی رہنمائی اور حوصلہ افزائی نے نوجوان کرکٹرز کے اعتماد میں اضافہ کیا، جو آئندہ ڈومیسٹک سیزن میں اپنی کارکردگی کے ذریعے خود کو ثابت کرنے کے لیے پرجوش ہیں۔

نوجوان کھلاڑیوں کے ساتھ یہ خصوصی ملاقات مستقبل کے کرکٹ ٹیلنٹ کی رہنمائی اور انہیں اعلی سطح کی کرکٹ کے لیے تیار کرنے کی ایک مثبت کاوش قرار دی جا رہی ہے۔ آفریدی نے کھلاڑیوں کے لیے نیک خواہشات کا اظہار کرتے ہوئے انہیں زمبابوے کے دورے کے دوران اپنی بہترین صلاحیتوں کا مظاہرہ کرنے اور پاکستان کرکٹ کے روشن مستقبل کے لیے اپنا کردار ادا کرنے کی تلقین کی۔