ہرنائی،استاد معاشرے کا وہ معمار ہے جو علم، تربیت اور کردار سازی کے ذریعے نئی نسل کی رہنمائی کرتا ہے، ڈپٹی کمشنر

نمائندہ۔ 05 اکتوبرہرنائی (اے پی پی):ڈپٹی کمشنر ہرنائی میر ارشد حسین جمالی نے یومِ اساتذہ کے موقع پر اپنے خصوصی پیغام میں اساتذہ کی عظمت کو سلام پیش کرتے ہوئے انہیں خراجِ تحسین پیش کیا ہے۔ڈپٹی کمشنر نے کہا کہ استاد معاشرے کا وہ معمار ہے جو علم، تربیت اور کردار سازی کے ذریعے نئی نسل کی رہنمائی کرتا ہے اور قوموں کے روشن مستقبل کی بنیاد رکھتا ہے۔انہوں نے کہا کہ آج وہ جس مقام پر خدمات سرانجام دے رہے ہیں اس میں ان کے اساتذہ کی تعلیم، تربیت، رہنمائی اور انتھک محنت کا بنیادی کردار ہے۔ میں خود بھی استاد رہ چکا ہوں، اس لیے اس مقدس پیشے کی ذمہ داریوں، مشکلات اور اہمیت سے بخوبی آگاہ ہوں۔میر ارشد حسین جمالی نے کہا کہ استاد صرف کتابی علم منتقل نہیں کرتا بلکہ طلبہ کی شخصیت سازی، اخلاقی تربیت، شعور اجاگر کرنے اور مثبت سوچ پروان چڑھانے میں بھی کلیدی کردار ادا کرتا ہے۔

ایک اچھا استاد اپنے شاگردوں کو علم کے ساتھ ساتھ زندگی میں آگے بڑھنے، مشکلات کا سامنا کرنے اور معاشرے کا ذمہ دار شہری بننے کا درس دیتا ہے۔ڈپٹی کمشنر ہرنائی کا مزید کہنا تھا کہ معاشرے میں اساتذہ کو عزت و احترام دینا ہم سب کی اجتماعی ذمہ داری ہے، کیونکہ آج کے ڈاکٹر، انجینئر، افسر، سیاستدان، صحافی اور زندگی کے دیگر شعبوں سے وابستہ تمام افراد کسی نہ کسی استاد کی محنت اور رہنمائی کا ہی ثمر ہیں۔انہوں نے یومِ اساتذہ کے موقع پر ملک بھر خصوصاً بلوچستان کے تمام اساتذہ کو خراجِ تحسین پیش کرتے ہوئے کہا کہ ان کی گرانقدر خدمات کو ہمیشہ یاد رکھا جائے گا۔ استاد کی عظمت کو سلام ہے کیونکہ قوموں کی ترقی اور نئی نسل کے روشن مستقبل میں اساتذہ کا کردار بنیادی حیثیت رکھتا ہے۔