شدید مخالفت کے باوجود جیانی انفینٹینو کی فیفا صدارت پر دوبارہ کامیابی کے امکانات روشن

زیورخ۔13اکتوبر (اے پی پی):فٹ بال کی عالمی تنظیم (فیفا )کے صدر جیانی انفینٹینو آئندہ سال مارچ میں چوتھی اور آخری مدت کے لیے دوبارہ منتخب ہو سکتے ہیں کیونکہ ان پر تنقید کے باوجود اب تک کوئی دوسرا مضبوط امیدوار سامنے نہیں آیا۔ اے ایف پی کے مطابق جیانی انفینٹینو کو افریقی اور جنوبی امریکی فٹ بال تنظیموں کی حمایت حاصل ہے، جو ان کی کامیابی میں اہم کردار ادا کر سکتی ہیں۔56 سالہ جیانی انفینٹینو کو اس وقت کئی فٹ بال تنظیموں کی مخالفت کا سامنا ہے، جب انہوں نے ورلڈ کپ کے انتظام اور تجارتی معاملات کے لیے نجی سرمایہ کاری پر مبنی منصوبہ پیش کیا، تاہم بعد میں اسے واپس لے لیا۔ اس منصوبے کے تحت فیفا کے بڑے مقابلوں، خصوصاً ورلڈ کپ، کے انتظام کے لئے ایک الگ تجارتی ادارہ قائم کیا جانا تھا۔جیانی انفینٹینو کے ممکنہ حریفوں میں شامل یورپی فٹ بال تنظیم کے سربراہ الیگزینڈر چیفرین اور شمالی امریکی فٹ بال تنظیم کے سربراہ وکٹر مونٹالیانی اپنے موجودہ عہدوں پر دوبارہ انتخاب لڑنے کا ارادہ رکھتے ہیں۔ اس صورت حال میں مخالفین کے لیے متفقہ امیدوار تلاش کرنا مشکل ہو گیا ہے۔ صدارتی امیدواروں کو 18 نومبر تک اپنی نامزدگی کا اعلان کرنا ہوگا۔کھیلوں کی مارکیٹنگ کے ماہر ٹیرنس برنز کے مطابق، جیانی انفینٹینو اس وقت مضبوط پوزیشن میں ہیں اور ممکنہ امیدواروں کے لیے انہیں چیلنج کرنا آسان نہیں۔ بین الاقوامی اولمپک کمیٹی کے سابق مارکیٹنگ سربراہ مائیکل پین نے بھی کہا کہ کسی مضبوط امیدوار کا سامنے نہ آنا حیران کن ہے اور جیانی انفینٹینو کی دوبارہ کامیابی کے امکانات بڑھتے دکھائی دے رہے ہیں۔دوسری جانب ناروے فٹ بال فیڈریشن کی سربراہ لیزے کلاوینیس نے جیانی انفینٹینو پر تنقید کی ہے، تاہم انہوں نے فیڈریشن کے صدارتی انتخاب لڑنے سے انکار کردیا ہے۔ ان کے اور ناروے کی فٹ بال فیڈریشن کے تحفظات میں امریکی صدر ڈونلڈ ٹرمپ کے ساتھ جیانی انفینٹینو کے تعلقات اور نجی سرمایہ کاری کے مجوزہ منصوبے کی شفافیت اہم معاملات ہیں۔جیانی انفینٹینو کے مخالفین نے امریکا میں قانونی کارروائیوں کے علاوہ فیفا کی متعلقہ کمیٹیوں میں باضابطہ شکایات بھی درج کرائی ہیں۔ یورپی فٹ بال تنظیم نے بھی مجوزہ تجارتی منصوبے سے متعلق دستاویزات تک رسائی کے لیے امریکی عدالتوں سے رجوع کیا ہے جبکہ فیفا اس قانونی کارروائی کی مخالفت کر رہا ہے۔مبصرین کے مطابق،سپین، فرانس اور انگلینڈ جیسے بڑے فٹ بال ممالک کی جانب سے جیانی انفینٹینو کی حمایت میں کمی ان کے لیے نقصان دہ ثابت ہو سکتی ہے۔ تاہم موجودہ صورت حال میں مخالفین کے لیے مشترکہ امیدوار پر اتفاق کرنا مشکل دکھائی دیتا ہے، جس سے جیانی انفینٹینو کی دوبارہ انتخاب میں کامیابی کے امکانات برقرار ہیں۔