لاہور۔26فروری (اے پی پی):صدر مملکت ڈاکٹر عارف علوی نے کہا ہے کہ پاکستان میں پوری دنیا کے لیے تجارت اور سیاحت کے بے پناہ مواقع اور امکانات موجود ہیں، حکومت نے کورونا وائرس کی وبا کے باوجود کاروبار کرنے میں آسانی کے لیے 28 اقدامات کئے ہیں۔
ان خیالات کا اظہار انہوں نے ہفتہ کے روز گورنر ہائوس لاہور میں وزارت تجارت اور ٹریڈ ڈویلپمنٹ اتھارٹی پاکستان کے زیر اہتمام پہلے پاکستان انجینئرنگ اینڈ ہیلتھ کیئر شو 2022 سے خطاب کرتے ہوئے کیا۔
اس موقع پر گورنر پنجاب چوہدری محمد سرور،وزیر اعظم کے مشیر برائے کامرس ، تجارت و سرمایہ کاری عبدالرزاق داو¿د ، وفاقی وزیر برائے نیشنل فوڈ سیکورٹی اینڈ ریسرچ سید فخر امام سمیت ملکی اور غیر ملکی سرمایہ کاروں کی کثیر تعداد موجود تھی۔
تقریب سے خطاب کرتے ہوئے صدر مملکت نے کہا کہ حکومت نے بین الاقوامی تجارت کی بہتری، کاروبار میں آسانی اور سیاحت کے فروغ کے لئے متعدد اقدامات کئے ہیں، حکومت نے کورونا وائرس کی وبا کے باوجود کاروبار کرنے میں آسانی کے لیے 28 اقدامات کیے ہیں۔
انہوں نے کہا کہ پاکستان سرمایہ کاری ، سیاحت ، خوبصورتی اور بہترین دوست لوگوں کی سرزمین ہے۔انہوں نے غیر ملکی مندوبین کو پاکستان آنے پر خوش آمدید کہتے ہوئے دعوت دی کہ وہ یہاں اپنے قیام میں توسیع کریں اور خوبصورت پاکستان کا دورہ کریں۔
صدر مملکت نے کہا کہ پاکستان وسطی ایشیا، چین، ترکی اور یورپی ممالک کے لیے اقتصادی مرکز کے ساتھ ساتھ جیو اکنامک مرکز بھی بن رہا ہے کیونکہ دنیا پاکستان کے ذریعے چین اور وسطی ایشیائی ممالک کے ساتھ تجارت کر سکتی ہے۔
انہوں نے کہا کہ ازبکستان اور دیگر وسط ایشیائی ممالک کے دورے کے دوران محسوس کیا کہ ان ممالک کی قیادت پاکستان سے تجارت کا بے تابی سے انتظار کر رہی ہے۔انہوں نے کہا کہ شاہراہ ریشم کو کاروبار اور تجارت میں بہت اہمیت حاصل ہے اور اس نے دنیا کو چین اور وسطی ایشیائی ممالک سے ملادیا ہے۔
ڈاکٹر عارف علوی نے کہا کہ پاکستان سرجیکل اور کھیل جیسے شعبوں میں بہترین مصنوعات تیار کر رہا ہے لیکن بدقسمتی سے کئی ممالک پاکستانی مصنوعات کو ری برانڈ کر کے دوسرے ممالک کو فروخت کررہے ہیں۔
انہوں نے کہاکہ ہمارے پاس افریقہ اور وسطی ایشیائی ریاستوں کو پیش کرنے کے لیے بہت کچھ ہے۔انہوں نے غیر ملکی مندوبین کو یقین دلایا کہ حکومت نے کاروبار کو آسان بنا دیا ہے اور بین الاقوامی تاجروں کو دعوت دی کہ وہ یہاں آکر بغیر کسی رکاوٹ کے کاروبار کریں۔
صدر ڈاکٹر عارف علوی نے کہا کہ پاکستانی عوام ایمانداری، مہمان نوازی اور کارکردگی میں بہترین ہیں۔ انہوں نے کہا کہ کورونا سے نمٹنے کیلئے پاکستان کی حکمت عملی کامیاب رہی جسے پوری دنیا میں سراہا گیا۔
انہوں نے کہا، ہمارے پاس دنیا کو پیش کرنے کے لیے بے شمار معیاری مصنوعات موجود ہیں۔تقریب کے دوران صدر مملکت نے پاکستان ٹریڈ پورٹل اور ٹورازم کیلئے میٹ پاکستان ایپ کا باقا عدہ آغاز کیا۔
قبل ازیں تقریب سے خطاب کرتے ہوئے گورنر پنجاب چوہدری محمد سرور نے کہا پاکستان میں معاشی سرگرمیاں عروج پر ہیں اور پہلے پاکستان انجینئرنگ اینڈ ہیلتھ کیئر شو 2022 کے ذریعے پاکستان کی مصنوعات کو عالمی سطح پر متعارف کرایا جا رہا ہے۔ انہوں نے ٹیکسٹائل سیکٹر کی برآمدات کو 15سے 18بلین ڈالر تک لے جانے پر مشیر تجارت عبدالرزاق داود کی کارکردگی کو سراہا۔
انہوں نے کہا کہ کورونا کے باوجود پاکستانی مصنوعات کی برآمدات میں اضافہ خوش آئند ہے۔ تقریب سے خطاب کرتے ہوئے وزیر اعظم کے مشیر برائے کامرس ، تجارت و سرمایہ کاری عبدالرزاق داود نے افریقہ اور سنٹرل ایشین ممالک سے آنے والے وفود کو تاریخی شہر لاہور آنے پر خوش آمدید کہتے ہوئے کہا کہ پاکستان میں سرمایہ کاری کے وسیع ترمواقع موجود ہیں۔
کورونا کے بعد یہاں پہلی نمائش کا انعقاد کیا گیا ہے جس سے پاکستانی مصنوعات کو فروغ ملے گا۔300سے زائد غیر ملکی وفود کا یہاں آنا پاکستان کی معاشی اور سفارتی کامیابی ہے۔
انہوں نے کہا کہ اگلے ہفتے ازبکستان کا اعلیٰ سطحی وفد پاکستا ن آ رہا ہے جبکہ ترکمانستان ، تاجکستان ، قذاقستان و دیگر ممالک سے بھی تجارتی وفود پاکستان آ رہے ہیں اس سے باہمی تجارت کو فروغ ملے گا۔
