آئی سی سی بورڈ اور کمیٹیوں کے اجلاس 25 سے 27 مارچ تک قطر میں ہوں گے

کولمبو ۔22فروری (اے پی پی):بین الاقوامی کرکٹ کونسل (آئی سی سی )نے اعلان کیا ہے کہ آئندہ بورڈ اور کمیٹیوں کے اجلاس 25 سے 27 مارچ 2026 تک قطر کے دارالحکومت دوحہ میں منعقد ہوں گے۔ ان اجلاسوں میں آئی سی سی کے بورڈ ڈائریکٹرز، چیف ایگزیکٹوز، مختلف کمیٹیوں کے اراکین اور اعلیٰ عہدیداران شرکت کریں گے جہاں عالمی کرکٹ کے اہم معاملات اور مستقبل کی حکمتِ عملی پر غور کیا جائے گا۔دوحہ میں اجلاسوں کے انعقاد کا فیصلہ قطر میں کرکٹ کے فروغ اور ملک کے مضبوط اسپورٹس ڈھانچے کے تناظر میں کیا گیا ہے۔

آئی سی سی کی قطر کرکٹ ایسوسی ایشن اور قطر اولمپک کمیٹی کے ساتھ اشتراک کے نتیجے میں حالیہ برسوں میں کھیل کو نمایاں ترقی حاصل ہوئی ہے۔ 2020 کے بعد قطر میں کرکٹ میں مجموعی شرکت میں 447 فیصد اضافہ ریکارڈ کیا گیا، جس کی بڑی وجہ نوجوانوں اور نئے کھلاڑیوں کو کھیل کی طرف راغب کرنے کے اقدامات قرار دیے جا رہے ہیں۔

قطر اولمپک کمیٹی کے اسکول اولمپک پروگرام میں کرکٹ کی شمولیت اس پیش رفت کا اہم سبب بنی ہے، جس کے ذریعے ملک بھر کے تعلیمی اداروں میں کھیل کو متعارف کرایا گیا۔ دوحہ میں اجلاسوں کا انعقاد عالمی کرکٹ برادری میں قطر کے بڑھتے ہوئے کردار کو اجاگر کرے گا اور باہمی تعاون کو مزید مضبوط بنانے کا موقع فراہم کرے گا۔