آئی ٹی پی کا بڑی شاہراہوں پر ٹریفک قوانین کے نفاذ کے لیے ڈرون ٹیکنالوجی کا استعمال

اسلام آباد۔13جولائی (اے پی پی):اسلام آباد ٹریفک پولیس (آئی ٹی پی) نے ایکسپریس وے اور سری نگر ہائی وے سمیت دیگر اہم شاہراہوں پر ٹریفک کی خلاف ورزیوں پر نظر رکھنے کے لیے ڈرون ٹیکنالوجی کا استعمال کرتے ہوئے کیے گئے حالیہ آپریشنز کے دوران 300 سے زائد ڈرائیوروں کو جرمانے اور 350 سے زائد شہریوں کو رہنمائی بھی فراہم کی ہے۔

آئی ٹی پی حکام نے کہا ہے کہ چیف ٹریفک آفیسر کیپٹن (ر) سید ذیشان حیدر کی قیادت میں اس اقدام کا مقصد ریئل ٹائم مانیٹرنگ کے ذریعے ٹریفک قوانین پر سختی سے عمل درآمد کو یقینی بنانا ہے۔ انہوں نے کہا کہ ڈرونز کو لین ڈسپلن کی خلاف ورزیوں، اوور لوڈنگ، ون وہیلنگ اور ڈرائیونگ کے دیگر خطرناک رویوں کی نشاندہی کرنے کے لیے استعمال کیا جا رہا ہے۔

انہوں نے کہا کہ ڈرون کیمروں کے ذریعے حاصل کی گئی فوٹیج کی بنیاد پر قانونی کارروائی کے ذریعے 300 سے زائد ڈرائیوروں کو پہلے ہی جرمانہ کیا جا چکا ہے۔

انہوں نے کہا کہ آگاہی مہم کے ایک حصے کے طور پر 350 سے زائد شہریوں کو ٹریفک قوانین کے بارے میں آگاہی بھی دی گئی ہے۔

انہوں نے کہا کہ سنگین خلاف ورزیوں میں ملوث متعدد گاڑیوں کو بھی مقامی تھانوں میں بند کر دیا گیا ہے۔

سی ٹی او سید ذیشان حیدر نے کہا کہ ڈرون فوٹیج کا استعمال کرتے ہوئے خلاف ورزیوں کی نشاندہی ، موقع پر ہی چالان جاری کیے جا رہے ہیں اور کچھ کیسز میں گاڑیاں تحویل میں لی جا رہی ہیں۔

انہوں نے کہا کہ اگلے مرحلے میں ڈرون مانیٹرنگ کو بڑھایا جائے گا تاکہ شہر بھر کے تمام سیکٹرز اور اضافی بڑی سڑکوں کو شامل کیا جا سکے۔

انہوں نے مزید کہا کہ سڑکوں پر بھیڑ والے مقامات کا پتہ لگانے کے لیے ڈرونز کا بھی استعمال کیا جا رہا ہے جس سے ٹریفک کی روانی اور بہاؤ کو یقینی بنانے کے لیے خصوصی ٹیموں کی تیزی سے تعیناتی ممکن ہو رہی ہے۔