اجتماعی کوششوں سے بدعنوانی کی روک تھام یقینی بنائی جا سکتی ہے، چیئرمین قمرزمان چوہدری

کرپشن فری سو فیصد ترقی اور بدعنوانی سے پاک پاکستان نیب کی اولین ترجیح ہے ، اجتماعی کوششوں سے بدعنوانی کی روک تھام یقینی بنائی جا سکتی ہے، چیئرمین قمرزمان چوہدری

اسلام آباد ۔ 09 جولائی (اے پی پی) قومی احتساب بیورو (نیب) کے چیئرمین قمر زمان چوہدری نے کہا ہے کہ محنت ،عزم اور پروفیشنلزم کا کوئی شارٹ کٹ نہیں ،نیب اپنی پیشہ وارانہ ،شفافیت اور میرٹ پر عمل پیرا ہوتے ہوئے بدعنوان عناصر کو انصاف کے کٹہرے میں لانے کیلئے تمام وسائل بروئے کار لارہا ہے،کرپشن فری سو فیصد ترقی اور بدعنوانی سے پاک پاکستان نیب کی اولین ترجیح ہے ، اجتماعی کوششوں سے بدعنوانی کی روک تھام یقینی بنائی جا سکتی ہے ۔اتوارکو یہاں نیب سے جاری پریس ریلیزکے مطابق چیئرمین نیب نے کہا کہ نیب نے چین کے ساتھ ایم او یو پر دستخط کئے ہیں تاکہ سی پیک کے منصوبوں میں شفافیت کو یقینی بنایا جاسکے، جس سے دونوں ملکوں کے درمیان اعتمادسازی میں اضافہ ہوگا۔انہوں نے کہا کہ نیب نے مقدمات بروقت نمٹانے کا دورانیہ زیادہ سے زیادہ 10 ماہ مقررکیا گیا ہے سینئر سپروائزری افسران کی اجتماعی دانش سے فائدہ اٹھانے کیلئے مشتمل مشترکہ تحقیقاتی ٹیم کا نظام وضع کیاگیا ہے۔ مشترکہ تحقیقاتی ٹیم ایڈیشنل ڈائریکٹر، انویسٹی گیشن اور لیگل کنسلٹنٹ پر مشتمل ہے جس کے باعث نہ صرف کارکردگی میں بہتری آئی ہے بلکہ نیب کا کوئی بھی افسر تحقیقات پر اثر انداز نہیں ہو سکتا،انہوں نے کہا کہ بدعنوانی کی روک تھام ہماراقومی فرض ہے بدعنوانی کی روک تھام کیلئے اجتماعی کوششوں سے اس میں نمایاں کامیابی ملے گی،انہوںنے کہا کہ نیب کرپشن فری سو فیصد ترقی اور بدعنوانی سے پاک پاکستان کیلئے پر عزم ہے ،انہوں نے نیب افسران کو ہدایت کی کہ وہ اپنا قومی فرض شفافیت اور میرت پر عمل کرتے ہوئے ادا کریں۔