احمد پور شرقیہ سانحہ میں پاکستان پٹرولیم رولز1937ءکی خلاف ورزی پر شیل پاکستان لمیٹڈ پر ایک کروڑ روپے جرمانہ عائد

احمد پور شرقیہ سانحہ میں پاکستان پٹرولیم رولز1937ءکی خلاف ورزی پر شیل پاکستان لمیٹڈ پر ایک کروڑ روپے جرمانہ عائد
اوگرا کا جاں بحق افراد کے لواحقین کو فی کس 10 لاکھ اور زخمیوں کو فی کس 5 لاکھ روپے معاوضہ ادا کرنے کا حکم

اسلام آباد ۔ 07 جولائی (اے پی پی) آئل اینڈ گیس ریگولیٹری اتھارٹی (اوگرا) نے احمد پور شرقیہ کے المناک سانحہ میں پاکستان پٹرولیم رولز1937ءکی خلاف ورزی پر شیل پاکستان لمیٹڈ (ایس پی ایل) کو ایک کروڑ روپے جرمانہ عائد کرتے ہوئے سانحہ میں جاں بحق افراد کے لواحقین کو فی کس 10 لاکھ اور زخمیوں کو فی کس 5 لاکھ معاوضہ ادا کرنے کا حکم دیدیا ہے۔ کمپنی کو تین دن کے اندر اندر معاوضوں کی ادائیگی کی ہدایت کی گئی ہے۔ جمعہ کو اوگرا کی جانب سے جاری 13 صفحات پر مشتمل رپورٹ کے مطابق احکامات پر عملدرآمد میں ناکامی پر کمپنی پر مزید جرمانہ عائد کیا جائے گا اور قوانین کے مطابق سخت تادیبی کارروائی بھی کی جائے گی جس میں مارکیٹنگ سرگرمیوں کا تعطل بھی شامل ہے۔ اوگرا نے تھرڈ پارٹی انسپکٹرز (ٹی پی آئیز) کے جائے وقوعہ کے دورہ اور ابتدائی معلومات حاصل کرنے کے بعد یہ رپورٹ تیار کی ہے۔ رپورٹ میں انکشاف کیا گیا ہے کہ ایس پی ایل نے مروت انٹرپرائزز سے جو ٹینکر حاصل کئے تھے اس میں پاکستان پٹرولیم رولز 1937ءکی پیروی نہیں کی گئی تھی۔ ٹینکر کے پاس سی آئی ای لائسنس بھی نہیں تھا۔