اسلام آباد پولیس نے مبینہ جسم فروشی مرکز پر چھاپے کے دوران 3 مرد، 7 خواتین کو گرفتار کرلیا

اسلام آباد۔31مئی (اے پی پی):اسلام آباد کیپٹل ٹیریٹری (آئی سی ٹی) پولیس نے نجی ہاؤسنگ سوسائٹی میں مبینہ جسم فروشی مرکز پر چھاپے کے دوران تین مردوں اور سات خواتین کو حراست میں لے کر ملزمان کے خلاف قانونی کارروائی شروع کر دی۔

لوہی بھیر پولیس نے تھانے کی حدود میں مبینہ غیر اخلاقی اور غیر قانونی سرگرمیوں کے حوالے سے مصدقہ اطلاع ملنے پر چھاپہ مارا۔پولیس کے مطابق اے ایس آئی ظفر اقبال کی قیادت میں ایک پولیس ٹیم، دیگر پولیس اہلکاروں اور ایک لیڈی کانسٹیبل کے ساتھ جائے وقوعہ پر پہنچی اور سرچ آپریشن کیا ۔ چھاپے کے دوران پولیس نے تین مردوں اور سات خواتین کو حراست میں لیا اور انہیں مزید قانونی کارروائی کے لیے تھانے منتقل کر دیا۔

فرسٹ انفارمیشن رپورٹ (ایف آئی آر) کے مطابق، پولیس نے ایک مشتبہ شخص کو بھی نامزد کیا جس کی شناخت طلحہ کے نام سے ہوئی ہے، جو مبینہ طور پر مبینہ دھندے کی نگرانی کر رہا تھا اورگاہکوں کے لئے سہولت کاری کر رہا تھا۔اہلکار نے بتایا کہ پاکستان پینل کوڈ کی دفعہ 294 اور انسانی اسمگلنگ کی روک تھام ایکٹ 2018 کی متعلقہ دفعات کے تحت لوہی بھیر پولیس اسٹیشن میں مقدمہ درج کیا گیا ہے، جبکہ مزید تفتیش جاری ہے۔

پولیس نے کہا کہ کیس کے تمام پہلوؤں بشمول سہولت کاروں اور منتظمین کے مبینہ کردار کی تفتیش کی جارہی ہے اور مزید گرفتاریوں کو خارج از امکان قرار نہیں دیا جاسکتا۔اہلکار نے بتایا کہ اسلام آباد پولیس امن و امان کو برقرار رکھنے کے لیے وفاقی دارالحکومت کے مختلف علاقوں میں مجرمانہ اور غیر قانونی سرگرمیوں کے خلاف کارروائیاں جاری رکھے ہوئے ہے۔