امریکہ پاکستان کا اہم کاروباری شراکت دار ہے ‘ پاکستان میں توانائی کے شعبے میں امریکی کمپنیاںبھرپور سرگرم ہیں ٍ،عمر ایوب خان

اسلام آباد۔9اکتوبر (اے پی پی): وفاقی وزیر برائے توانائی عمر ایوب خان نے کہا ہے کہ امریکہ پاکستان کا اہم کاروباری شراکت دار ہے ‘ پاکستان میں توانائی کے شعبے میں امریکی کمپنیاںبھرپور سرگرم ہیں اور امریکی کمپنیاں توانائی کی مارکیٹ سے بخوبی آگاہ ہیں۔انہوں نے ان خیالات کا اظہار یو ایس پاکستان بزنس کونسل کے تحت ایکسپلور پاکستان کے عنوان سے ورچوئل تقریب میں کیا۔ عمر ایوب خان اوروزیر اعظم کے معاون خصوصی برائے پٹرولیم ندیم بابر کو یو ایس پی بی سی کی جانب سے امریکی کاروباری برادری کو گھریلو صارفین اور صنعتوں کی بڑھتی ہوئی توانائی کی طلب کو کم کرنے کے سلسلہ میں حکومت پاکستان کی کوششوں کے بارے میں بریفنگ کے لئے مدعو کیا گیا ، توانائی کے شعبے میں حالیہ پالیسی پیشرفت ، تیل و گیس کے شعبے میں حکومت کی اصلاحات اور توانائی کے شعبے میں سرمایہ کاری کے لئے مراعات کے بارے میں آگاہ کیا گیا۔ اس تقریب کی صدارت اسٹیون کوبوس ، چیئرمین یو ایس پاکستان بزنس کونسل ، صدر اور منیجنگ ڈائریکٹر ، ایکسلٹریٹ انرجی نے کی اور معززین کا استقبال کیا۔انہوںنے اس بات پر زور دیا کہ یو ایس پی بی سی کے ذریعہ توانائی کے شعبے میں ، ورچوئل سیریز کا آغاز خاص طور پر امریکی کاروباری پورٹ فولیو کی بحالی کے لئے کیا گیا ہے۔ عمر ایوب خان نے یو ایس پی بی سی کے ورچوئل سیریز کے اقدام کوسراہتے ہوئے کہا کہ امریکہ پاکستان کا ایک اہم کاروباری شراکت دار ہے۔ انہوں نے اس بات کو سراہا کہ پاکستان میں توانائی کے شعبے میں امریکی کمپنیاں ایک مضبوط نقش قدم کے طور پر موجود ہیں اور یہ کہ امریکی کمپنیاں توانائی کی مارکیٹ سے بخوبی آشنا ہیں۔ یو ایس پی بی سی کے ممبروں کی بجلی کے شعبے میں سرمایہ کاری کے حوالے سے عمر ایوب خان نے توانائی میں قابل تجدید ذرائع کے اضافے کے حکومتی پالیسی اقدامات پر زور دیا اور اس شعبے میں امریکی سرمایہ کاری کے لئے دعوت دی۔ انہوں نے بتایا کہ حکومت بجلی کی تقسیم کے لئے مسابقتی منڈی میں جا رہی ہے اور اس نے ملک کی طلب اور رسد کے پیرامیٹرز اور اس کو سرمایہ کاری کے فیصلوں کے مطابق کرنے کے لئے ایک انٹیگریٹڈ جنریشن کیپیسٹی توسیعی منصوبہ تیار کیا ہے۔ انہوں نے بتایا کہ چھوٹے پن بجلی کے لئے ایک مخصوص پالیسی تیار کی گئی ہے تاکہ اس بات کو یقینی بنایا جاسکے کہ صارفین کو قابل تجدید اور سستی بجلی کے فوائد دستیاب ہوں۔ بجلی کی پائیدار فراہمی کو یقینی بنانے کی گنجائش میں اضافہ کرتے ہوئے ، صاف ستھرے ایندھن کے استعمال کی جانب بڑھنے کی کوشش کی جارہی ہے اور امریکی کمپنیوں کو ان علاقوں میں سرمایہ کاری کی دعوت دی ہے۔وزیر اعظم کے معاون خصوصی برائے پیٹرولیم ندیم بابر نے تیل و گیس کے شعبے میں پاکستان میں کاروباری ماحول کے بارے میں بات چیت کرتے ہوئے، حکومت کی طرف سے جاری کاروباری حامی پالیسیوں کا ایک جائزہ پیش کیا۔ انہوں نے پاکستان میں ریفائننگ سیکٹر کی بحالی کی ضرورت پر زور دیتے ہوئے کہاکہ متوسط آمدنی کی بڑی آبادی کے ساتھ بڑھتی ہوئی توانائی کی ضروریات ہیں اور ریفائنریز کی موجودہ صلاحیت معدوم ہے اور امریکی کمپنیوں کو اس شعبے میں سرمایہ کاری کرنے کی ترغیب دی جا رہی ہے۔ انہوں نے براو ¿ن فیلڈ اور گرین فیلڈ آئل ریفائنری کی سرمایہ کاری کے لئے حکومت کی طرف سے فراہم کردہ مخصوص مراعات کا جائزہ پیش کیا۔معاون خصوصی نے بتایا کہ پاکستان اپنے اہم ترین شعبے میں عالمی سطح پر سرمایہ کاری کے چیلنجز سے نبٹنے کیلئے اس نے پیٹرولیم ایکسپلوریشن رائٹس کے لئے گزشتہ ہفتے میں دس بلاک کے لئے اشتہار دیا تھا اور امریکی کمپنیوں کو بولی کی دعوت دی تھی۔ انہوں نے مزید بتایا کہ جلد ہی وزارت پٹرولیم ڈویڑن اور وزارت توانائی ساحلوں کے قریب دریافت کے لئے بلاسک کو پیش کرے گی۔ معاون خصوصی ندیم بابر نے ملک میں آئندہ گیس کے بنیادی ڈھانچے پر تبصرہ کرتے ہوئے آگاہ کیا کہ ملک کے شمال سے جنوب میں 1.6بلین کیوبک فٹ ٹرانسمیشن کے قابل 1100 کلومیٹر طویل ٹرنک پائپ لائن پر کام کا آعاز ہوگا۔ زیر زمین گیس ذخیرہ کرنے کی سہولیات ، ساحل کے گیس ٹرمینلز پر تمام اسٹیک ہولڈرزتیزی سے عمل پیرا ہیں اور امریکی کمپنیوں کو ان مواقع سے فائدہ اٹھانا چاہئے۔سفارتخانہ پاکستان کے ڈپٹی چیف آف مشن عبیدالرحمن نظامانی اور امریکی سفارتخانے کے قائم مقام ڈپٹی چیف آف مشن رچرڈ سنسلائر نے بھی اس موقع پر خطاب کیا اور امریکی پاکستان تجارتی اور سرمایہ کاری تعلقات کو آگے بڑھانے کی اہمیت پر زور دیا۔ ورچوئل کانفرنس میں امریکی محکمہ تجارت اور پاکستان سے آئے ہوئے بورڈ آف انویسٹمنٹ ، وزارت سمندری امور ، چیمبر آف کامرس ، او جی ڈی سی ایل ، ماری پٹرولیم کے نمائندوں نے بھی شرکت کی۔ اس تقریب کے بعد امریکی کمپنیوں نے دونوں معززین سے سوال و جواب کا آغاز کیا۔وفاقی وزیر عمر ایوب اور معاون خصوصی ندیم بابر نے اس اہم تقریب کی میزبانی پر اسٹیون کوبوس ، ایسپرانزا جیلانیانی صدراور امریکی صدر پاکستان بزنس کونسل کا شکریہ ادا کیا۔