امریکی ٹینس سٹار وینس ولیمز نے اطالوی اداکار سے شادی کرلی، خوشخبری کا سوشل میڈیا پر کا اعلان

لوریڈا ۔24دسمبر (اے پی پی):امریکا کی بین الاقوامی شہرت یافتہ ٹینس سٹار وینس ولیمز نے فلوریڈا میں اطالوی اداکار آندریا پریٹی سے شادی کرلی۔45 سالہ وینس ولیمز نے سوشل میڈیا کے ذریعے اپنی شادی کا باضابطہ اعلان کیا۔ وینس ولیمز اور آندریا پریٹی گزشتہ ہفتے کے آخر میں فلوریڈا کے شہر پام بیچ میں رشتۂ ازدواج میں منسلک ہوئے، جہاں شادی کی تقریبات 6 دن تک جاری رہیں۔

اس موقع پر وینس ولیمز نے کہا کہ بہن سرینا ولیمز نے قیمتی یاٹ کا تحفہ دیا، یاٹ میں فیملی کے قریبی افراد کو عشائیہ بھی دیا گیا اور سرینا ولیمز نے ہی یاٹ میں تمام کھانوں کا انتظام کیا۔ انہوں نے مزید کہا کہ کشتی پر 10 سے 12 خاندان کے افراد اور دوست موجود تھے، ہم نے ایک ہفتے خوب انجوائے کیا۔اس کے علاوہ سرینا ولیمز نے شادی کے موقع پر اپنی بہن کے لیے تصاویر کے ساتھ محبت بھرا پیغام بھی لکھا۔45 سالہ وینس ولیمز نے رواں سال جولائی میں واشنگٹن ڈی سی اوپن میں ٹور لیول سنگلز میچ جیت کر تاریخ رقم کی تھی، جس کے بعد انہوں نے اپنے منگیتر آندریا پریٹی کا خصوصی طور پر شکریہ ادا کیا تھا، جو اس موقع پر سٹیڈیم میں موجود تھے۔

آندریا پریٹی ڈنمارک نژاد اطالوی ماڈل اور اداکار ہیں۔سات مرتبہ گرینڈ سلام سنگلز ٹائٹل جیتنے والی وینس ولیمز نے 16 ماہ کے وقفے کے بعد دوبارہ ٹینس میں واپسی کی تھی اور اب وہ جنوری میں آکلینڈ سے وی ٹی اے ٹور کے اپنے 33ویں مسلسل سیزن کا آغاز کرنے کا ارادہ رکھتی ہیں۔فیشن میگزین ووگ ویڈنگز کے مطابق، یہ شادی اطالوی تقریبات کے بعد فلوریڈا میں انجام پائی، جہاں فیشن اور خوشیوں سے بھرپور تقاریب منعقد ہوئیں۔ وینس ولیمز نے اس موقع کو ’’زندگی کا سب سے خوشگوار، خوبصورت اور یادگار دن‘‘ قرار دیا۔