انسانی حقوق خصوصاً خواتین، بچوں اور اقلیتوں کے حقوق کے تحفظ کیلئے ہرممکن اقدامات اٹھائے جا رہے ہےں، وفاقی وزیر کامران مائیکل

اسلام آباد ۔ 06 جولائی (اے پی پی) وفاقی وزیر برائے انسانی حقوق سینیٹر کامران مائیکل نے کہا ہے کہ پاکستان میں انسانی حقوق کے تحفظ خصوصاً خواتین، بچوں اور اقلیتوں کے حقوق کے تحفظ کیلئے ہرممکن اقدامات اٹھائے جا رہے ہےں، اقوام متحدہ اور یورپی یونین کی قراردادوں پر عملدرآمد کو یقینی بنانے کیلئے موجودہ حکومت جامع پالیسی کے تحت اقدامات اٹھا رہی ہے اور اس ضمن میں قانون سازی عمل میں لائی جا رہی ہے۔ جمعرات کو ”اے پی پی“ سے گفتگو کرتے ہوئے انہوں نے کہا کہ جی ایس پی پلس سٹیٹس سے پاکستان اور یورپی ممالک کے درمیان نہ صرف روابط میں بہتری آئی ہے بلکہ اس کی مدد سے بین الاقوامی سطح پر پاکستان کا امیج بہتر ہوا ہے۔ انہوں نے کہا کہ انسانی حقوق کے تحفظ کیلئے وفاقی حکومت صوبوں کو ساتھ لے کر مطلوبہ اہداف کو بروقت مکمل کرنے کیلئے پر عزم ہے۔ کامران مائیکل نے کہا کہ پاکستان میں بنیاد ی انسانی حقوق کے تحفظ اور خاص کر خواتین، بچوں اور اقلیتوں کے تحفظ کیلئے اقدامات اٹھائے گئے ہیں اور اس ضمن میں مزید قانون سازی کی جا رہی ہے۔