ایف آئی ایچ ہاکی پرو لیگ ، بیلجیئم نے نیدرلینڈز کو ہرا کرٹائٹل اپنے نام کر لیا

لاہور۔28جون (اے پی پی):بیلجیئم کی مردوں کی ہاکی ٹیم ریڈ لائنز نے نیدرلینڈز کے خلاف اہم کامیابی حاصل کرکے ایف آئی ایچ ہاکی پرو لیگ 2025-26 کا ٹائٹل اپنے نام کر لیا ،اس کے ساتھ ہی لاس اینجلس2028 اولمپکس کے لیے براہِ راست کوالیفائی کرنے والی پہلی مردوں کی ٹیم بھی بن گئی۔

میزبان امریکا پہلے ہی اولمپکس میں جگہ بنا چکا ہے۔ یہ بیلجیئم کا پرو لیگ کا دوسرا ٹائٹل ہے، جبکہ اس سے قبل وہ2021 میں بھی چیمپئن بن چکا تھا۔ موجودہ اولمپک کوالیفکیشن نظام کے مطابق2025-26 اور2026-27 کے ایف آئی ایچ پرو لیگ چیمپئنز کو لاس اینجلس اولمپکس کا براہِ راست ٹکٹ دیا جاتا ہے، جس کے باعث ریڈ لائنز نے تقریبا دو سال قبل ہی اپنی اولمپک شرکت یقینی بنا لی ہے۔ پورے سیزن میں بیلجیئم نے شاندار اور مستقل کارکردگی کا مظاہرہ کیا۔ مضبوط دفاع اور جارحانہ کھیل کی بدولت ٹیم نے صرف ایک میچ میں شکست کھائی، جبکہ انگلینڈ، آسٹریلیا اور نیدرلینڈز جیسے مضبوط حریف مختلف مواقع پر اہم پوائنٹس گنواتے رہے۔ ایف آئی ایچ کے صدر طیب اکرام نے بیلجیئم کی کامیابی پر مبارکباد دیتے ہوئے کہا کہ پرو لیگ جیسے سخت مقابلے میں چیمپئن بننا ایک غیرمعمولی کارنامہ ہے۔ ان کے مطابق ٹوکیو 2020 اولمپک چیمپئن ریڈ لائنز نے ایک بار پھر ثابت کر دیا کہ وہ دنیا کی بہترین ٹیموں میں شامل ہیں اور لاس اینجلس اولمپکس میں ان کی شرکت عالمی ہاکی کے لیے خوش آئند ہوگی۔اس کامیابی کے بعد بیلجیئم کی ٹیم آئندہ دو برس اولمپک کوالیفکیشن کی فکر کے بغیر دیگر بین الاقوامی ٹورنامنٹس پر اپنی توجہ مرکوز کر سکے گی۔ پرو لیگ ٹرافی کی باضابطہ تقریبِ تقسیم سیزن کے آخری میچ کے بعد بیلجیئم کے شہر واورے میں ہوگی، جہاں ٹیم اپنے مداحوں کے سامنے ٹرافی اٹھائے گی۔