این آر ای-1 میڈیکل امتحان کل اتوار کو منعقد ہوگا

اسلام آباد۔13دسمبر (اے پی پی):غیر ملکی میڈیکل اور ڈینٹل گریجویٹس کے لیے نیشنل رجسٹریشن امتحان (این آر ای-1) کل اتوار کو ملک بھر کے بڑے علاقائی مراکز میں منعقد کیا جائے گا۔این آر ای امتحان پاکستان میڈیکل اینڈ ڈینٹل کونسل کی پالیسی کے مطابق نیشنل یونیورسٹی آف میڈیکل سائنسز (نمز)راولپنڈی کے زیرِ اہتمام لیا جائے گا۔اعداد و شمار کے مطابق مجموعی طور پر 7,076 میڈیکل اور ڈینٹل گریجویٹس نےپاکستان میڈیکل اینڈ ڈینٹل کونسل میں رجسٹریشن کرائی ہے جو کل ہونے والے امتحان میں شرکت کریں گے۔ ان میں 6,989 میڈیکل گریجویٹس اور 87 ڈینٹل گریجویٹس شامل ہیں۔پاکستان میڈیکل اینڈ ڈینٹل کونسل کی جانب سے جاری بیان کے مطابق امتحان ملک کے چار مقامات پر منعقد کیا جائے گا۔اسلام آباد/راولپنڈی میں 2,358 میڈیکل اور 43 ڈینٹل امیدوار، کراچی میں 499 میڈیکل اور 4 ڈینٹل امیدوار، لاہور میں 3,562 میڈیکل اور 30 ڈینٹل امیدوار جبکہ پشاور میں 570 میڈیکل اور 10 ڈینٹل امیدوار امتحان میں شریک ہوں گے۔

یہ امیدوار غیر ملکی تعلیمی اداروں سے ڈگری حاصل کرنے والے گریجویٹس ہیں جو پاکستان میں میڈیکل اور ڈینٹل لائسنس کے حصول کے خواہاں ہیں۔پاکستان میڈیکل اینڈ ڈینٹل کونسل پالیسی کے مطابق کوئی بھی غیر ملکی گریجویٹ اس امتحان میں کامیابی حاصل کیے بغیر عارضی یا مستقل رجسٹریشن یا آزادانہ پریکٹس کا اہل نہیں ہوگا۔کونسل مسلسل ایک شفاف، معیاری اور بین الاقوامی معیار سے ہم آہنگ امتحانی نظام کے ذریعے واپس آنے والے گریجویٹس کی پیشہ ورانہ صلاحیت کا جائزہ یقینی بناتی رہی ہے۔

این آر ای کے دونوں مراحل کامیابی سے مکمل کرنے والے امیدواروں کو قانون کی متعلقہ دفعات کے مطابق رجسٹریشن سرٹیفکیٹس جاری کیے جائیں گے۔امتحان کے تمام انتظامات مکمل کر لیے گئے ہیں۔ امیدواروں کو ہدایت کی گئی ہے کہ وہ صبح 10 بجے تک اپنے متعلقہ امتحانی مراکز پر رپورٹ کریں، جبکہ امتحان دوپہر 12:00 بجے شروع ہوگا۔مقررہ ایس او پیز کی خلاف ورزی کرنے والے کسی بھی امیدوار کو امتحان میں بیٹھنے کی اجازت نہیں دی جائے گی۔

پاکستان میڈیکل اینڈ ڈینٹل کونسل نے والدین کو مشورہ دیا ہے کہ وہ اپنے بچوں کو میڈیکل یا ڈینٹل تعلیم کے لیے بیرونِ ملک بھیجتے وقت صرف تسلیم شدہ، منظور شدہ اورپاکستان میڈیکل اینڈ ڈینٹل کونسل سے منظور شدہ اداروں میں داخلہ یقینی بنائیں، اورپاکستان میڈیکل اینڈ ڈینٹل کونسل کی پالیسیوں پر سختی سے عمل کریں۔اس ضمن میں پاکستان میڈیکل اینڈ ڈینٹل کونسل پالیسیوں کی عدم تعمیل مستقبل کے امیدواروں کے لیے نتائج کا باعث بن سکتی ہے۔

کونسل نے والدین اور طلبہ کو سختی سے ہدایت کی ہے کہ وہ داخلے کے لیے بیرونِ ملک کسی بھی کم معیار یا غیر معیاری میڈیکل اور ڈینٹل کالج میں داخلہ لینے سے گریز کریں، خصوصاً صحت جیسے مقدس پیشے میں، جو براہِ راست انسانی جانوں سے وابستہ ہے۔پاکستان میڈیکل اینڈ ڈینٹل کونسل نے والدین کو یہ بات بھی سمجھنے کی تلقین کی ہے کہ غیر تسلیم شدہ یا کم معیار اداروں کا انتخاب نہ صرف ان کے بچوں کے پیشہ ورانہ مستقبل کو خطرے میں ڈالتا ہے بلکہ محنت سے کمائی گئی مالی وسائل کے ضیاع اور قیمتی وقت و برسوں کی محنت کے ناقابلِ تلافی نقصان کا سبب بھی بنتا ہے۔پاکستان میڈیکل اینڈ ڈینٹل کونسل کے مطابق آج کیے گئے ذمہ دارانہ تعلیمی فیصلے میڈیکل پیشے کی ساکھ کے تحفظ اور مستقبل کے صحت کے پیشہ ور افراد کے بہتر مستقبل کے لیے ناگزیر ہیں۔