برآمدات میں اضافے کے لیے حکومت اور نجی شعبے کا تعاون ناگزیر ہے، صدر آئی سی سی آئی

اسلام آباد۔17جنوری (اے پی پی):اسلام آباد چیمبر آف کامرس اینڈ انڈسٹری کے صدر ناصر منصور قریشی نے پاکستان کی معاشی ترقی میں نجی شعبے کے اہم کردار پر روشنی ڈالتے ہوئے کہا ہے کہ نجی شعبہ ملک کا ایک اہم شعبہ ہے جو بے روزگاری اور غربت کو کم کرنے میں مدد کرتا ہے۔

یہ سٹارٹ اپس اور چھوٹے کاروباروں کو سپورٹ کرکے جدت طرازی اور انٹرپرینیورشپ کو فروغ دیتا ہے، نئی صنعتوں اور مواقع کی تخلیق کو آگے بڑھاتا ہے۔جمعہ کو جاری ہونے والے ایک بیان میں صدر قریشی نے برآمدات کے فروغ میں نجی شعبے کی صلاحیت کا ذکر کرتے ہوئے کہا ہے کہ ٹیکسٹائل، فارماسیوٹیکل، کانوں اور معدنیات، فوڈ پروسیسنگ، اور آئی ٹی جیسی صنعتوں میں زرمبادلہ کی کمائی کو بڑھانے کی صلاحیت موجود ہے۔

انہوں نے عوامی خدمات اور بنیادی ڈھانچے کے منصوبوں کو آگے بڑھانے کے لیے پبلک پرائیویٹ پارٹنرشپ کی اہمیت پر بھی زور دیا۔نجی شعبے کی صلاحیتوں سے پوری طرح فائدہ اٹھانے کے لیے آئی سی سی آئی کے صدر نے ایسی پالیسیوں پر زور دیا جو انٹرپرینیورشپ، اختراعات اور سرمایہ کاری کی حوصلہ افزائی کریں۔

انہوں نے کہا کہ حکومت اور نجی شعبے کے درمیان باہمی تعاون سے پاکستان کی اقتصادی صلاحیت کو بڑھاوا دیا جا سکتا ہے ترقی کو فروغ مل سکتا ہے اور ایک خوشحال مستقبل کی راہ ہموار ہو سکتی ہے۔آئی سی سی آئی کے سینئر نائب صدر عبدالرحمٰن صدیقی اور نائب صدر ناصر محمود چوہدری نے کہا کہ نجی شعبے کی جدت اور مارکیٹ کے بدلتے ہوئے رجحانات سے ہم آہنگ ہونے کی صلاحیت پاکستان کو عالمی معیشت میں مسابقتی رہنے میں مدد دے سکتی ہے۔