بنگلہ دیش ویمنز کی نیپال کو 0-3 سے شکست، پوائنٹس ٹیبل پر پہلی پوزیشن حاصل

بینکاک ۔19جنوری (اے پی پی):بنگلہ دیش کی خواتین قومی فٹسال ٹیم نے سیف ویمنز فٹسال چیمپئن شپ 2026 میں شاندار کارکردگی کا سلسلہ برقرار رکھتے ہوئے نیپال کو 0-3 سے شکست دے کر پوائنٹس ٹیبل پر پہلی پوزیشن حاصل کر لی۔ڈھاکہ ٹریبیون کے مطابق یہ مقابلہ بینکاک کے نونتھابوری سٹیڈیم میں کھیلا گیا۔میچ کے آغاز سے ہی بنگلہ دیش نے جارحانہ اور تیز رفتار کھیل پیش کیا اور مسلسل نیپال کے دفاع پر دباؤ رکھا۔ اگرچہ ابتدائی لمحات میں چند مواقع ضائع ہوئے، تاہم 14ویں منٹ میں کپتان صابینا خاتون نے شاندار فنش کے ذریعے ٹیم کو برتری دلا دی۔

پانچ منٹ بعد 19ویں منٹ میں کرشنا رانی سرکار نے، جو پہلے گول پر اسسٹ بھی دے چکی تھیں، گیند کو جال میں پہنچا کر برتری کو دگنا کر دیا۔ اس طرح بنگلہ دیش نے ہاف ٹائم تک 0-2 کی واضح برتری حاصل کر لی تھی۔دوسرے ہاف میں بھی بنگلہ دیش کا کنٹرول برقرار رہا اور ٹیم نے کھیل کی رفتار پر مکمل گرفت رکھی۔ اگرچہ مزید کئی واضح مواقع ضائع ہوئے، تاہم 33ویں منٹ میں متبادل کھلاڑی لیپی اختر نے عمدہ گول سکور کر کے برتری 0-3 کر دی۔

گول کیپر سوپنا اختر جھلی نے شاندار کارکردگی کا مظاہرہ کرتے ہوئے متعدد خطرناک شاٹس کو روکا اور ٹیم کو کلین شیٹ دلانے میں اہم کردار ادا کیا۔بنگلہ دیش نے ٹورنامنٹ کا آغاز بھارت کے خلاف 1-3 کی فتح سے کیا تھا، جبکہ دوسرے میچ میں دو گول کے خسارے کے باوجود بھوٹان کے خلاف 3-3 سے مقابلہ برابر کیا۔ نیپال کے خلاف اس فتح کے بعد بنگلہ دیش کے 3 میچز میں 7پوائنٹس ہو گئے ہیں اور ٹیم اعتماد و تسلسل کے ساتھ پوائنٹس ٹیبل پر سرفہرست ہے۔