تاجروں کے مسائل کے حل کے لئے کرنل سعید کو فوکل پرسن مقرر کیا گیا ہے،مشیر تجارت عبدالرزاق داﺅد کا ٹویٹ

اسلام آباد ۔ یکم اپریل (اے پی پی) وزیراعظم کے مشیر برائے تجارت عبدالرزاق داﺅد نے کہا ہے کہ تاجروں کے مسائل کے حل کے لئے کرنل سعید کو فوکل پرسن مقرر کیا گیا ہے۔ بدھ کو اپنے ٹویٹ میں انہوں نے کہا کہ نیشنل کمانڈ اینڈ آپریشنل سنٹر کے اجلاس میں کاروباری افراد کو درپیش مسائل پر غور کیا گیا اور ان کے مسائل کے حل کے لئے اقدامات کرنے کا فیصلہ کیا گیا، اس مقصد کے لئے کرنل سعید کو فوکل پرسن تعینات کیا گیا ہے۔ تاجر اپنے مسائل کے خوش اسلوبی سے حل کے لئے ان سے رابطہ کر سکتے ہیں۔ انہوں نے ایک اور ٹویٹ میں کہا کہ بعض فرموں نے امریکی ڈالر فروخت کرنے کے لئے کمرشل بنیادوں پر فیصلے کئے، اب وہ حکومت سے مطالبہ کر رہے ہیں کہ ان کے 15 ارب روپے کا نقصان پورا کیا جائے۔ انہوں نے کہا کہ میرا خیال ہے کہ یہ کوئی کاروباری فیصلہ نہیں تھا جس پر عملدرآمد نہ کیا جاتا، یہ درست نہیں ہے اس پر اعلیٰ سطح پر تبادلہ خیال کیا اور حکومت نے فیصلہ کیا ہے کہ ان فرموں کو ٹیکس دہندگان کی رقم سے معاوضہ نہیں دیا جائے گا۔