تاجکستان اور مالدیپ کے سفیروں کا اسلام آباد چیمبر آف کامرس اینڈ انڈسٹری کا دورہ، چیمبر کی نئی قیادت کو مبارکباد پیش کی

اسلام آباد۔2اکتوبر (اے پی پی):تاجکستان کے سفیر یوسف شریف زادہ اور مالدیپ کے ہائی کمشنر محمد تھوہا نے بدھ کو اسلام آباد چیمبر آف کامرس اینڈ انڈسٹری (آئی سی سی آئی) کا دورہ کیا۔ دورے کے دوران انہوں نے نومنتخب صدر، سینئر نائب صدر، نائب صدر اور ایگزیکٹو کمیٹی کو مبارکباد پیش کی ۔اس موقع پر سفیر یوسف شریف زادہ نے تاجکستان اور پاکستان کے درمیان گہرے تعلقات پر زور دیا اور دونوں برادر ممالک کے درمیان موجود تجارت اور سرمایہ کاری کے وسیع امکانات پر زور دیا۔ انہوں نے ان باہمی فوائد پر روشنی ڈالی جن کا فائدہ بہتر تعاون کے ذریعے حاصل کیا جا سکتا ہے اور یہ کہ دونوں ممالک اپنے عوام کی فلاح و بہبود کے لیے ان مواقع سے فائدہ اٹھانے کے لیے پرعزم ہیں۔

دیرینہ دوستی کی طرف توجہ مبذول کراتے ہوئے سفیر نے دونوں ممالک کو "ایک ہی جسم اور روح کا حصہ” سے تشبیہ دی اور نہ صرف تاجکستان بلکہ پورے وسطی ایشیا میں پاکستانی مصنوعات کی بہت زیادہ مانگ پر تبصرہ کیا۔ انہوں نے دونوں ممالک پر زور دیا کہ وہ اپنے موجودہ تعلقات کو مضبوط اور وسعت دینے کو ترجیح دیں۔سفیر شریف زادہ نے کاسا-1000قابل تجدید توانائی کے بنیادی ڈھانچے کے پراجیکٹ کے بارے کہا کہ یہ منصوبہ 2025 میں پایہ تکمیل کو پہنچے گا۔ مزید برآں انہوں نے پاکستانی تاجر برادری بالخصوص آئی سی سی آئی کے اراکین کو 24 اکتوبر کو دوشنبے میں ہونے والی آئندہ نمائش میں شرکت کی دعوت دی۔مالدیپ کے ہائی کمشنر محمد تھوہا نے پاکستان اور مالدیپ کے درمیان قریبی برادرانہ تعلقات کا اظہار کرتے ہوئے اپنے ملک میں سرمایہ کاری کے وسیع مواقع کا ذکر کیا۔

انہوں نے پاکستانی تاجروں کی حوصلہ افزائی کی کہ وہ ان مواقع کو تلاش کریں اور باہمی فائدے کے لیے تجارتی تعلقات کو فروغ دیں۔ مسابقتی نرخوں پر اعلیٰ معیار کے مالدیپی ٹونا کی درآمد کے امکانات کو اجاگر کرتے ہوئے انہوں نے تجویز پیش کی کہ پاکستانی کاروباری مالدیپ کو سبزیاں اور پھل برآمد کرکے دونوں ممالک کے درمیان تجارت کو مزید فروغ دے سکتے ہیں۔آئی سی سی آئی کے صدر ناصر منصور قریشی نے اپنے خیرمقدمی کلمات میں مہمانوں کی آمد پر ان کا تہہ دل سے شکریہ ادا کیا ۔ اپنی ٹیم کا تعارف کراتے ہوئے صدر قریشی نے سفیروں کو دونوں ممالک کے ساتھ تجارتی تعلقات کو نئی بلندیوں تک بڑھانے کے لیے آئی سی سی آئی کے عزم کی یقین دہانی کرائی جس سے دونوں اطراف کی اقتصادی ترقی کو فروغ ملے گا۔

انہوں نے دوست ممالک کے چیمبرز آف کامرس کے ساتھ مل کر کام کر نے کے لیے آئی سی سی آئی کے عزم کا اعادہ کیا تاکہ کاروبار میں آسانی ہو۔ایف پی سی سی آئی کے سابق صدر زبیر احمد ملک نے تمام شعبوں میں سرمایہ کاری کے بے پناہ امکانات کو اجاگر کیا اور اس کو موثر انداز میں عملی جامہ پہنانے کی ضرورت پر زور دیا جبکہ یونائیٹڈ بزنس گروپ کے سیکرٹری جنرل ظفر بختاوری نے دو طرفہ تعلقات کو مضبوط بنانے کے لیے فضائی رابطے بڑھانے کی اہمیت پر زور دیا۔ اس موقع پر آئی سی سی آئی کے نائب صدر ناصر محمود چوہدری، ایگزیکٹو ممبران طاہر ایوب، چوہدری عبدالمجید اور دیگر نے بھی شرکت کی۔