تربیت کے ذریعے رویوں میں آنے والی تبدیلی سے افراد کی ذہنی صلاحیتوں میں بہتری رونماہوگی‘ ماروی میمن

بی آئی ایس پی کا ڈبلیو ایف پی کے اشتراک سے غذائیت کے شعبے سے وابستہ کارکنان کوتربیت فراہم کرنے کیلئے ورکشاپ کا انعقاد
تربیت کے ذریعے رویوں میں آنے والی تبدیلی سے افراد کی ذہنی صلاحیتوں میں بہتری رونماہوگی‘ ماروی میمن

اسلام آباد ۔ 07 جولائی (اے پی پی) بی آئی ایس پی نے ورلڈ فوڈ پروگرام (ڈبلیو ایف پی) کے اشتراک سے غذائیت کے شعبے میں اپنے سماجی کارکنان کوتربیت فراہم کرنے کیلئے گزشتہ روز بی آئی ایس پی ہیڈ کوارٹر میں ورکشاپ کا انعقاد کیا۔ یہ ماسٹر ٹرینرزملک بھر کے 32اضلاع میں50,000بی آئی ایس پی بینیفشری کمیٹیوں (بی بی سیز)کے ذریعے 1.5ملین مستحق ماﺅں کو غذائیت کے موضوع پر آگاہی فراہم کریں گے۔ وزیر مملکت و چیئرپرسن بی آئی ایس پی، ایم این اے ماروی میمن، کنٹری ڈائریکٹر ڈبلیو ایف پی مسٹر فن بار کورن‘ ڈپٹی کنٹری ڈائریکٹر ڈبلیو ایف پی مسٹر سٹیفن گلوننگ‘ ڈبلیو ایف پی ہیڈ آف نیوٹریشن مس سیسلا گارزون، سیکرٹری بی آئی ایس پی یاسمین مسعود، ڈبلیو ایف پی پالیسی افیسر ڈاکٹر علی احمد خان، ٹیم لیڈرز، بی آئی ایس پی کی شراکتی فرموں عورت فاﺅنڈیشن اور ماٹ میکڈانلڈ پاکستان کے کلسٹر انچارجز اور سوشل موبلائزرز نے ٹریننگ میں شرکت کی۔ اپنے افتتاحی خطاب میں، چیئرپرسن بی آئی ایس پی ماروی میمن نے کہا کہ یہ ایک انقلاب کی شروعات ہے اور اس تربیت کے ذریعے رویوں میں آنے والی تبدیلی سے افراد کی ذہنی صلاحیتوں میں بہتری رونماہوگی جس سے آنے والی نسلوں کی نشونما میں اضافہ ہوگا۔ انہوں نے مزید کہا کہ بی آئی ایس پی اور ڈبلیو ایف پی کے مابین شراکت غذائی قلت اور نامکمل ذہنی و جسمانی نشونما پانے والے بچوں میں کمی لاتے ہوئے بنیادی سطح پر اثرانداز ہوگی جس سے ملک کے غریب افراد کو فائدہ ہوگا۔