حکومت ملک میں عوامی فلاح، دیہی ترقی اور بنیادی سہولتوں کی فراہمی کے ایجنڈے پر تیزی سے عمل پیرا ہے، رانا ثناء اللہ خان

فیصل آباد۔ 05 جولائی (اے پی پی):وزیراعظم کے مشیر برائے سیاسی و عوامی امور سینیٹر رانا ثناء اللہ خاں نے کہا ہے کہ حکومت ملک میں عوامی فلاح، دیہی ترقی اور بنیادی سہولتوں کی فراہمی کے ایجنڈے پر تیزی سے عمل درآمد کر رہی ہے، شہری اور دیہی آبادی کے درمیان سہولتوں کا فرق ختم کرنے کیلئے گیس، سڑکوں، صحت اور دیگر بنیادی شعبوں میں بڑے ترقیاتی منصوبے شروع کیے جارہے ہیں جبکہ عوام سے کئے گئے تمام وعدے ہر صورت پورے کئے جائیں گے۔

ان خیالات کا اظہار انہوں نے چک نمبر 77 ج ب ملاں پور میں سوئی گیس فراہمی اور 29.5 کلومیٹر طویل سڑک کی مرمت اور تعمیر نو کے منصوبوں کی افتتاحی تقریب سے خطاب کرتے ہوئے کیا۔ تقریب میں مقامی سیاسی و سماجی شخصیات، منتخب نمائندوں، سرکاری افسران اور علاقے کے معززین کی بڑی تعداد نے شرکت کی۔ رانا ثناء اللہ خاں نے کہا کہ موجودہ حکومت عوام سے کئے گئے وعدوں کی تکمیل کو اپنی اولین ذمہ داری سمجھتی ہے اور دیہی آبادی کو بھی وہی بنیادی سہولتیں فراہم کی جائیں گی جو شہری علاقوں کو میسر ہیں۔ انہوں نے کہا کہ حکومت مرحلہ وار علاقے کے تمام دیہاتوں تک سوئی گیس کی فراہمی یقینی بنائے گی تاکہ دیہی خاندان بھی جدید سہولتوں سے مستفید ہو سکیں۔

انہوں نے کہا کہ ماضی میں ایک یا ڈیڑھ کلومیٹر سڑک کا افتتاح غیر معمولی کارنامہ قرار دیا جاتا تھا، جبکہ موجودہ حکومت تقریباً تیس کلومیٹر طویل سڑک کی تعمیر نو کر رہی ہے جس سے بارہ دیہات کے ہزاروں مکینوں کو براہ راست فائدہ پہنچے گا۔ انہوں نے کہا کہ معیاری سڑکیں صرف آمدورفت کو آسان نہیں بناتیں بلکہ زرعی پیداوار کی بروقت ترسیل، مقامی تجارت کے فروغ اور معاشی سرگرمیوں میں اضافے کا بھی ذریعہ بنتی ہیں۔ انہوں نے کہا کہ انتخابات کے نتائج کچھ بھی ہوں، عوام کی خدمت اور ان کے مسائل کا حل حکومت کی ذمہ داری ہے۔

انہوں نے کہا کہ مسلم لیگ (ن) نے ہمیشہ عوامی خدمت کی سیاست کی ہے اور آئندہ بھی ترقیاتی منصوبوں کا سلسلہ اسی جذبے کے ساتھ جاری رکھا جائے گا۔ انہوں نے کہا کہ علاقے میں بہتر طبی سہولتوں کی فراہمی کے لیے تحصیل ہیڈکوارٹر (ٹی ایچ کیو) سطح کا ہسپتال بھی قائم کیا جائے گا۔ انہوں نے کہا کہ مسلم لیگ (ن) کی قیادت نے ہمیشہ ملک کی ترقی، استحکام اور عوامی فلاح کو اپنی سیاست کا محور بنایا ہے۔ انہوں نے کہا کہ پاکستان آج دنیا میں ایک باوقار اور ایٹمی طاقت کے طور پر پہچانا جاتا ہے جس کی وجہ سے عالمی سطح پر ملک کی عزت اور وقار میں اضافہ ہوا ہے۔انہوں نے کہا کہ پاکستان کی مسلح افواج نے فیلڈ مارشل سید عاصم منیر کی قیادت میں ”معرکہ حق“ میں کامیابی حاصل کی جس پر پوری قوم کو فخر ہے۔

انہوں نے کہاکہ اس کامیابی کے بعد دنیا نے پاکستان کی عسکری صلاحیت اور پیشہ ورانہ مہارت کو تسلیم کیا ۔ سیاسی صورتحال پر اظہار خیال کرتے ہوئے رانا ثناء اللہ خاں نے کہا کہ بعض سیاسی عناصر نے ملک میں نفرت، گالم گلوچ اور انتقامی سیاست کو فروغ دیا، مخالفین کے خلاف کارروائیاں کیں اور عوام کو گمراہ کرنے کی کوشش کی۔ انہوں نے کہا کہ ان پر منشیات کا جھوٹا مقدمہ بنایا گیا حالانکہ انہوں نے کبھی کسی منشیات فروش، چوری یا قتل کے مقدمے میں سفارش نہیں کی۔ انہوں نے کہا کہ انہوں نے ہمیشہ قانون کی بالادستی اور ذمہ دارانہ سیاست پر یقین رکھا ہے۔ انہوں نے کہا کہ ایران اور امریکہ کے درمیان جنگ بندی کی کوششوں میں وزیراعظم شہباز شریف اور فیلڈ مارشل سید عاصم منیر نے اہم کردار ادا کیا جبکہ ایرانی قیادت اور مثبت کردار ادا کرنے والے امریکی حلقے بھی مبارکباد کے مستحق ہیں۔

انہوں نے کہا کہ آج عالمی سطح پر پاکستان کو امن کے قیام میں کردار ادا کرنے والے ملک کے طور پر تسلیم کیا جا رہا ہے۔ انہوں نے کہا کہ حکومت ملک کی معاشی بہتری کے لیے بھی سنجیدہ اقدامات کر رہی ہے۔ انہوں نے امید ظاہر کی کہ ایران پر پابندیاں ختم ہونے اور تیل کی فراہمی بحال ہونے سے عوام کو ریلیف ملے گا، جنگی حالات کے باعث بڑھنے والی مہنگائی میں کمی آئے گی اور اشیائے ضروریہ کی قیمتوں میں نمایاں کمی ممکن ہو سکے گی۔انہوں نے کہا کہ حکومت ترقیاتی منصوبوں کے معیار پر کسی قسم کا سمجھوتہ نہیں کرے گی اور اگر سڑک کی تعمیر میں معیار کو برقرار نہ رکھا گیا تو متعلقہ ٹھیکیدار کو آئندہ کسی منصوبے میں کام کرنے کی اجازت نہیں دی جائے گی۔ انہوں نے عوام پر زور دیا کہ وہ ملک کی ترقی، استحکام اور خوشحالی کے لیے مخلص قیادت کا ساتھ دیں تاکہ قومی ترقی کا سفر مزید تیزی سے آگے بڑھ سکے۔