راولپنڈی،نالہ لئی میں پانی کی سطح بلند، طغیانی کا خدشہ ،کٹاریاں اور گوالمنڈی پر الرٹ، بارش کا سلسلہ جاری

راولپنڈی۔19اگست (اے پی پی):راولپنڈی اور گردونواح میں گزشتہ رات سے جاری شدید بارش کے باعث نالہ لئی کے کیچمنٹ ایریاز میں پانی کی سطح مسلسل بلند ہو رہی ہے، کٹاریاں اور گوالمنڈی کے مقامات پر الرٹ جاری کر دیا گیا ہے ، متعلقہ اداروں کو صورتحال پر کڑی نظر رکھنے کی ہدایت کی گئی ہے۔فلڈ فورکاسٹنگ کے اعداد و شمار کے مطابق 18 اگست کی رات سے 19 اگست کی صبح تک مختلف بارش ناپنے والے مراکز پر نمایاں بارش ریکارڈ کی گئی۔ شمس آباد کے مقام پر سب سے زیادہ 122 ملی میٹر بارش ہوئی جبکہ پیرودھائی میں 118 ملی میٹر اور نیو کٹاریاں میں 115 ملی میٹر بارش ریکارڈ کی گئی۔اسی دوران پی ایم ڈی ایچ-8/2 اور کچہری کے مقام پر 99، بوکرا (سی ٹی ٹی آئی آئی-12) میں 97، سیدپور ولیج میں 95 جبکہ گولڑہ، ای-11 کے قریب، 94 ملی میٹر بارش ریکارڈ کی گئی۔ نالہ لئی کے بیسن میں اوسط بارش 97.27 ملی میٹر ریکارڈ ہوئی۔اعداد و شمار کے مطابق کٹاریاں میں نالہ لئی کی سطح 17 فٹ جبکہ گوالمنڈی میں 15.5 فٹ ریکارڈ کی گئی، جس کے باعث دونوں مقامات پر الرٹ برقرار ہے۔ پانی کی سطح میں مزید اضافے کے پیش نظر نالہ لئی کے اطراف میں صورتحال کی مسلسل نگرانی کی جا رہی ہے۔فلڈ فورکاسٹنگ سسٹم کے مطابق کٹاریاں اور گوالمنڈی میں پانی کی سطح 20 فٹ تک پہنچنے کی صورت میں انخلا کی ضرورت پیش آ سکتی ہے۔ موجودہ صورتحال میں دونوں مقامات پر پانی کی سطح انخلا کی حد سے کم ہے تاہم مزید بارش کی صورت میں پانی کی سطح میں اضافے کا امکان موجود ہے۔ضلعی انتظامیہ، واسا اور دیگر متعلقہ اداروں کو نالہ لئی اور اس سے ملحقہ علاقوں میں مسلسل نگرانی برقرار رکھنے اور ہنگامی صورتحال سے نمٹنے کے لیے ضروری انتظامات مکمل رکھنے کی ہدایت کی گئی ہے۔ شہریوں کو بھی نالہ لئی کے کناروں، نشیبی علاقوں اور برساتی نالوں کے قریب غیر ضروری نقل و حرکت سے گریز کرنے کی ہدایت کی گئی ہے۔محکمہ موسمیات اور فلڈ فورکاسٹنگ سسٹم کی جانب سے بارش اور نالہ لئی میں پانی کی سطح سے متعلق صورتحال کو مسلسل مانیٹر کیا جا رہا ہے، جبکہ پانی کی سطح میں کسی بھی غیر معمولی اضافے کی صورت میں متعلقہ اداروں کو فوری طور پر آگاہ کیا جائے گا۔