روسی سفیر کی پاکستانی قوم کو یومِ آزادی پر مبارکباد، مضبوط تعلقات کے عزم کا اعادہ

اسلام آباد۔13اگست (اے پی پی):پاکستان میں روس کے سفیر البرٹ پی خوروف نے یومِ آزادی کے موقع پر پاکستانی عوام کو دلی مبارکباد پیش کرتے ہوئے پاکستان اور روس کے درمیان دوستانہ اور باہمی احترام پر مبنی تعلقات کو اجاگر کیا ہے۔جمعرات کو جاری اپنے تہنیتی پیغام میں سفیر خوروف نے کہا کہ پاکستان کا یومِ آزادی پاکستانی عوام کی ’’جرأت، عزم اور مضبوط جذبے‘‘ کی عکاسی کرتا ہے۔انہوں نے کہا کہ پاکستان نے گزشتہ کئی دہائیوں کے دوران اپنے بانیانِ وطن کے نظریات اور امنگوں کی رہنمائی میں ترقی کا اپنا راستہ اختیار کیا ہے۔

روسی سفیر نے پاکستان اور روس کے درمیان دیرینہ تعاون کو بھی اجاگر کرتے ہوئے کہا کہ دونوں ممالک مختلف شعبوں میں قریبی اور تعمیری تعلقات برقرار رکھے ہوئے ہیں۔انہوں نے اعتماد کا اظہار کیا کہ دونوں ممالک اپنے عوام کے مفاد میں باہمی مفاہمت کو مزید مضبوط بنانے اور شراکت داری کو وسعت دینے کا سلسلہ جاری رکھیں گے۔خوروف نے کہا کہ یومِ آزادی قومی فخر، خوشی اور جشن کا موقع ہے، اور امید ظاہر کی کہ پاکستان بھر میں امن، استحکام اور خوشحالی کا دور جاری رہے گا۔انہوں نے پاکستانی عوام کے لیے اچھی صحت، کامیابی اور خوشحالی کی دعا کی اور اپنے پیغام کا اختتام ان نعروں کے ساتھ کیا:’’پاکستان زندہ باد! روس پاک دوستی پائندہ باد!‘‘