روسی سکیورٹی کونسل کے نائب سیکرٹری کا نیٹو اور یورپی یونین پر بین الاقوامی دہشت گردی جیسے ہتھکنڈے استعمال کرنے کا الزام

ماسکو ۔16جولائی (اے پی پی):روسی سکیو رٹی کونسل کے نائب سیکرٹری یوری کوکوف نے نیٹو اور یورپی یونین پر الزام عائد کرتے ہوئے کہا ہے کہ ان کے استعمال کردہ طریقہ کار اس حد تک شدت اختیار کر چکے ہیں کہ وہ بین الاقوامی دہشت گردی کی تعریف پر پورا اترتے ہیں۔

تاس کے مطابق یوری کوکوف کا کہنا تھا کہ نیٹو اور یورپی یونین ایسے ذرائع اور ہتھکنڈے استعمال کر رہے ہیں جنہیں بین الاقوامی دہشت گردی کی شکل قرار دیا جا سکتا ہے۔انہوں نے دعویٰ کیا کہ اپنے سیاسی اور معاشی مفادات کے حصول کے لیے طاقت اور تشدد کا استعمال "اینگلو سیکسن مالیاتی اشرافیہ” کا دیرینہ طرزِ عمل رہا ہے، جن کی دولت ان کے بقول غیر ملکی علاقوں پر قبضے، نوآبادیاتی نظام، لوٹ مار اور غلاموں کی تجارت سے وابستہ رہی ہے۔کوکوف نے مزید کہا کہ ان حلقوں نے داخلی تنازعات کے حل اور بیرونی اثر و رسوخ بڑھانے کے لیے بھی ہمیشہ طاقت کا سہارا لیا۔انہوں نے یورپی یونین کے قیام کا حوالہ دیتے ہوئے کہا کہ 1992 کے معاہدۂ ماستریخت کے تحت امن، خوشحالی، اقوام کے درمیان مساوات، پائیدار ترقی، شہریوں کے لیے اعلیٰ سطح کے سماجی تحفظ، بین الاقوامی قانون اور اقوام متحدہ کے منشور کی پاسداری جیسے مقاصد کا اعلان کیا گیا تھا۔نیٹو اور یورپی یونین کی جانب سے اس بیان پر فوری طور پر کوئی ردِعمل سامنے نہیں آیا۔