روس کا یوکرین میں دفاعی صنعت کی سہولیات، آئل ریفائنری اور سٹیل پلانٹ کو نشانہ بنانے ، 12 گھنٹے کے دوران 822 ڈرون تباہ کرنے کا دعویٰ

ماسکو۔16اگست (اے پی پی):روس کی مسلح افواج نے یوکرین کے دارالحکومت کیف میں دفاعی صنعت کی سہولیات کےعلاوہ کریمینچگ آئل ریفائنری اور کریوی رگ میں سٹیل پلانٹ کو نشانہ بنایا ہے جبکہ12 گھنٹے کے دوران یوکرین سے روانہ کیے گئے 822 ڈرون اہداف پر پہنچنے سے پہلے تباہ کر دیئے۔

تاس کے مطابق روسی افواج نے یوکرینی دارالحکومت کیف میں ’’فائر پوائنٹ‘‘نامی کمپنی کو نشانہ بنایا، جو زمین سے فائر کیے جانے والے کروز میزائلوں ’’فلیمنگو‘‘کے لیے پرزے، وارہیڈز اور ٹھوس ایندھن والے بوسٹر تیار کرنے والی کمپنی ہے۔روسی افواج نے دارالحکومت کیف میں ’’یوکرین ڈیفنس‘‘ کمپنی کو بھی نشانہ بنایا، جو حملہ آور ڈرونز، ’’کرشچ‘‘ انٹرسیپٹر ڈرونز اور ’’گارپیا‘‘ فضائی دفاعی ڈرونز کے لیے پرزے تیار کرتی ہے۔ روسی افواج نے پولتاوا علاقے میں کریمینچگ آئل ریفائنری کو نشانہ بنایا، جہاں باقی ماندہ سٹوریج ٹینک بیرون ملک سے فراہم کردہ ایندھن اور چکنا کرنے والے مادوں کی پروسیسنگ جاری رکھے ہوئے ہیں۔

روسی فوج نے ڈنیپروپیٹروسک علاقے میں کریوی رگ کی سٹیل بنانے والی سہولیات کو نشانہ بنایا، جو ہتھیاروں اور فوجی آلات کے لیے رولڈ سٹیل تیار کرتی ہیں۔ روسی حکام کے مطابق روسی فضائی دفاعی افواج نے بیلگوروڈ، بریانسک، ولادیمیر، وولگوگراڈ، وورونیز، کالوگا، کورسک، لیپٹسک، نیژنی نووگوروڈ، اوریول، روستوو، ریازان، تیمبوف اور تولا علاقوں، ماسکو ، کراسنوڈار علاقہ اور کریمیا کے علاوہ بحیرہ ازوف اور بحیرہ اسود کے اوپر 822 یوکرینی ڈرونز کو تباہ کر دیا۔روسی وزارت دفاع کے مطابق یہ کارروائی 15 اگست کو ماسکو وقت کے مطابق شام 8 بجے سے 16 اگست کو صبح 8 بجے کے درمیان کی گئی۔