ریکٹر نیشنل اسکول آف پبلک پالیسی کی تقرری کے لیے ریٹائرڈ گریڈ 22 افسران سے درخواستیں طلب

اسلام آباد۔21اگست (اے پی پی):وفاقی حکومت نے گریڈ 22 سے ریٹائرڈ افسران کو نیشنل اسکول آف پبلک پالیسی کے ریکٹر کے عہدے کے لیے درخواستیں جمع کرانے کی ہدایت کی ہے۔ یہ تقرری چار سالہ غیر توسیع پذیر مدت کے لیے ہوگی، جیسا کہ نیشنل اسکول آف پبلک پالیسی آرڈیننس 2002 کی دفعہ 9 (2)(a) میں درج ہے۔ عہدے پر تقرری کی زیادہ سے زیادہ عمر کی حد 65 سال مقرر ہے۔اسٹیبلشمنٹ ڈویژن کے جاری کردہ نوٹس کے مطابق خواہشمند ریٹائرڈ افسران اپنی تازہ ترین سی وی بمعہ تصویر 30 اگست 2025 تک اسٹیبلشمنٹ ڈویژن، کابینہ بلاک اسلام آباد میں جمع کرائیں۔ درخواست میں تاریخ پیدائش، سروس میں شمولیت اور گریڈ 22 میں پروموشن کی تاریخ، سروس گروپ، تعلیمی قابلیت، تجربہ، کلیدی عہدے اور نمایاں کارہائے نمایاں واضح طور پر درج ہونا ضروری ہیں۔حکومت کے اس اقدام کا مقصد پالیسی سازی اور اعلیٰ سطحی تربیتی ادارے کی قیادت کے لیے موزوں اور تجربہ کار شخصیت کا انتخاب ہے، تاکہ نیشنل اسکول آف پبلک پالیسی کے ذریعے سرکاری افسران کی استعداد کار میں مزید اضافہ کیا جا سکے۔