سعودی عرب، ریاض ریجن کی پرنسیپلٹی اور رائل کمیشن نے شہر میں مملکت کا یومِ تاسیس دھوم دھام سے منانے کی تیاریوں کا آغاز کر دیا

ریاض ۔16فروری (اے پی پی):سعودی عرب کے ریاض ریجن کی پرنسیپلٹی اور رائل کمیشن نے شہر میں مملکت کا یومِ تاسیس دھوم دھام سے منانے کی تیاریوں کا آغاز کر دیا ، 22 فروری کو منائے جانے والے اس اہم ترین قومی دن کو ملکی سطح پر منانے کے لیے شہر شہر تقریبات ہوں گی۔اردو نیوز کے مطابق ریاض شہر میں اس سلسلے کی تقریب الحکم ڈسٹرکٹ میں القصر میں واقع العدل سکوائر پر ہو گی۔ان تقریبات میں ثقافتی اور سعودی میراث سے متعلق مواد کی نمائش کی جائے گی جو اپنے قیام سے آج تک سعودی ریاست کے سفر کے مختلف مرحلوں پر مشتمل ہوگی۔

اس نمائش میں وژوئل پرفارمنس اور انٹرایکٹیو تجربات کے ذریعے ان اہم اور پسندیدہ اقدار کو معاصر دستاویزی سٹائل میں پیش کیا جائے گا جو سعودی ریاست کے قیام میں تاریخی حیثیت کی حامل ہیں۔ان ایونٹس میں وہ نمائش شامل ہے جو پہلی اور دوسری سعودی ریاست کے مختلف مرحلوں کو اجاگر کرتے ہوئے مملکتِ سعودی عرب کے قیام تک کے اداوار پر مشتمل ہوگی،اس کا اختتام خادم الحرمینِ الشریفین شاہ سلمان بن عبدالعزیز کے موجودہ خوشحال دورپر ہوگا۔ان تقریبات میں العرضہ بھی لوگوں کو دیکھنے کو ملے گا جو سعودی ثقافتی میراث، جذبۂ تفاخر اور قومی وحدت کو منانے کے لیے پریڈ یا رقص کی صورت میں کیا جاتا ہے۔

اس کے علاوہ روایتی دستکاری اور لباس بھی نمائشوں میں موجود ہوں گے جن سے سعودی العرضہ کے مختلف پہلوؤں کے بارے میں انٹرایکٹیو انداز میں جاننے کا انتظام ہوگا۔نمائش میں فوٹوگرافی اور فالکنری کے علاوہ بچوں کے لیے خصوصی پروگرام بھی ترتیب دیے جائیں گے۔ العدل سکوائر پر ابھی سے مختلف قسم کی سرگرمیاں شروع ہو چکی ہیں جن میں ثقافتی اور ورثے کے پروگرام شامل ہیں جنہیں دیکھنے کے لیے آنے والے سعودی عرب کی قومی تاریخی کے بارے میں ایک بہترین پس منظر اور انٹرایکٹیو طریقے سے تاریخی حقائق کو مزید بہتر انداز میں سمجھ سکتے ہیں۔

سعودی پریس ایجنسی کے مطابق ان تقاریب میں شرکت کے لیے آنے والے WeBook platform کے ذریعے ایونٹس میں بغیر کوئی فیس ادا کیے شرکت کر سکتے ہیں۔22 فروری 1727 کو امام محمد بن سعود تخت نشین ہوئے اور اپنے ساتھ تین صدیوں قبل اپنے پیش روؤں کی قائم کردہ شہری ریاست کو ایک ایسی قوم کے دارالحکومت میں تبدیل کرنے کا خواب لے کر آئے جس نے اپنے عروج پر جزیرہ نماعرب کے بیش تر علاقوں میں امن اور استحکام لانا تھا۔