سکیورٹی مانیٹرنگ مضبوط بنانے کے لیے جدید مواصلاتی ٹیکنالوجیز استعمال کر رہے ہیں، اسلام آباد پولیس

اسلام آباد۔17مئی (اے پی پی):اسلام آباد کیپٹل ٹیریٹری (آئی سی ٹی) پولیس نے عالمی ٹیلی کمیونیکیشن اینڈ انفارمیشن سوسائٹی ڈے کے موقع پر عوام کی حفاظت، بلاتعطل رابطہ کاری اور فوری ہنگامی ردعمل یقینی بنانے میں جدید ٹیلی کمیونیکیشن سسٹم کے کردار کو اجاگر کیا ہے۔ پولیس حکام نے اتوار کو اے پی پی کو بتایا کہ اسلام آباد پولیس وفاقی دارالحکومت میں سکیورٹی مانیٹرنگ کو مضبوط بنانے، ہم آہنگی برقرار رکھنے اور ہنگامی صورتحال کے دوران بروقت ردعمل یقینی بنانے کے لیے جدید مواصلاتی ٹیکنالوجیز کو فعال طور پر استعمال کر رہی ہے۔انہوں نے کہا کہ پولیس ہیلپ لائن سسٹم، سیف سٹی سرویلنس کیمرے، جدید وائرلیس کمیونیکیشن نیٹ ورک اور FM-92.4 ریڈیو سروس امن و امان برقرار رکھنے اور شہریوں کو سہولت فراہم کرنے میں کلیدی کردار ادا کر رہے ہیں۔انہوں نے کہا کہ سیف سٹی اسلام آباد کی "برقی آنکھیں” اہم مقامات، سڑکوں اور حساس علاقوں کی مسلسل نگرانی کر رہی ہیں تاکہ پولیس کو مشکوک سرگرمیوں اور ہنگامی صورتحال کا فوری جواب دینے میں مدد مل سکے۔انہوں نے کہا کہ اسلام آباد پولیس پولیسنگ اور شہریوں کے تحفظ کو یقینی بنانے کے لیے جدید گشتی گاڑیاں، ڈیجیٹل کمیونیکیشن سسٹم اور مربوط مانیٹرنگ میکنزم بھی استعمال کر رہی ہے۔حکام کے مطابق، FM-92.4 شہریوں کے درمیان ٹریفک اپ ڈیٹس، سکیورٹی ایڈوائزریز اور عوامی تحفظ کے پیغامات کے حوالے سے آگاہی پھیلانے میں چوبیس گھنٹے مدد کر رہا ہے۔انہوں نے کہا کہ جدید ٹیلی کمیونیکیشن سسٹم نے پولیس فارمیشنز، ایمرجنسی یونٹس اور فیلڈ افسران کے درمیان کوآرڈینیشن کو نمایاں طور پر بہتر کیا جس سے فوری اور موثر کارروائی ممکن ہو رہی ہے۔انہوں نے اعادہ کیا کہ اسلام آباد پولیس شہریوں کو محفوظ ماحول فراہم کرنے کے لیے جدید ٹیکنالوجی اور جدید پولیسنگ کے طریقوں کو اپنانے کے لیے پرعزم ہے۔