سینیٹ کی قائمہ کمیٹی برائے قومی صحت کا اجلاس،اسلام آباد میں سرکاری ہسپتالوں کی نگرانی کیلئے ویجیلنس کمیٹی کے قیام کا اعلان

اسلام آباد۔5جنوری (اے پی پی):سینیٹ کی قائمہ کمیٹی برائے قومی صحت کا اجلاس سینیٹر عامر ولی الدین چشتی کی زیر صدارت منعقد ہوا۔اجلاس میں ڈاکٹروں کی دستاویزات کی تصدیق سے متعلق معاملات، پمز کے برن سینٹر سے متعلق معاملات ، پمز اور سکول آف ڈینٹسٹری سے متعلق کمیٹی کی سفارشات کے نفاذ کی صورتحال کا جائزہ لیا گیا۔پہلا ایجنڈا آئٹم نجی اراکین کے بل کے بارے میں تھا جس کا عنوان "پاکستان میڈیکل اینڈ ڈینٹل کونسل (ترمیمی) بل 2025،تھا جو سینیٹر ہمایوں محمد نے پیش کیا چونکہ موور میٹنگ میں موجود نہیں تھا اس لئے ایجنڈا آئٹم مؤخر کر دیا گیا۔ کمیٹی نے "ڈرگ ریگولیٹری اتھارٹی آف پاکستان (ترمیمی) بل، 2025” پر بھی بحث کی جس کا مقصد ادویات کی قیمتوں کو ریگولیٹ کرنا ہے۔

ادویات کی قیمتوں میں تیزی سے اضافہ کو اجاگر کرتے ہوئے چیئرمین نے عوامی مفاد میں مؤثر ضابطہ کاری کی ضرورت پر زور دیتے ہوئے کہا کہ ضروری ادویات عام آدمی کے لئے قابل برداشت رہنی چاہئیں۔ وفاقی وزیر برائے صحت سیدمصطفی کمال نے کمیٹی کو مطلع کیا کہ ادویات کی قیمتوں کی پالیسی زیر غور ہے اور قیمتیں جلد مستحکم کر دی جائیں گی۔ ان کی درخواست پر بل پر بحث ملتوی کر دی گئی۔تیسرا ایجنڈا آئٹم نجی اراکین کے بل کے بارے میں تھا جس کا عنوان "پاکستان میڈیکل اینڈ ڈینٹل کونسل (ترمیمی) بل 2025 تھا جو سینیٹر انوشہ رحمان احمد خان نے پیش کیا چونکہ یہ اعزازی نوعیت کا تھا اور موور میٹنگ میں موجود نہیں تھی، اس لئے ایجنڈا آئٹم مؤخر کر دیا گیا ، یہ اگلی میٹنگ میں زیر بحث لایا جائے گا۔

الیکٹرانک نکوٹین ڈیلیوری سسٹمز (ریگولیشن) بل 2025 پر تفصیل سے بات کی گئی۔ کمیٹی نے خاص طور پر 18 سال سے کم عمر بچوں میں الیکٹرانک نکوٹین ڈیوائسز، بشمول ویپ کی وسیع دستیابی اور استعمال پر شدید تشویش کا اظہار کیا ۔ بل کی توثیق کرتے ہوئے وفاقی وزیر صحت نے تجویز دی کہ وزارت تجارت و صنعت کو شامل کیا جائے تاکہ ایک جامع فریم ورک یقینی بنایا جا سکے۔ چیئرمین نے وزارت صحت اور ڈائریکٹر جنرل (صحت) کو بل پیش کرنے والے کے ساتھ مل کر مسودے کو مزید بہتر بنانے کی ہدایت کی۔ کمیٹی نے سینئر ڈاکٹروں کو تعلیمی دستاویزات کی تصدیق اور مساوی کرنے میں درپیش مشکلات پر بھی غور کیا۔

یہ واضح کیا گیا کہ صرف 2023 سے پہلے جاری کردہ دستاویزات کو PMDC IBCC کے ذریعے دوبارہ تصدیق کرتا ہے جبکہ 2023 کے بعد جاری کردہ مساوی سرٹیفکیٹس میں QR کوڈز ہوتے ہیں اور انہیں دوبارہ تصدیق کی ضرورت نہیں ہوتی۔ لاہور میں تعینات ایک مجرم افسر کے خلاف شکایت کے حوالے سے وفاقی وزیر نے کمیٹی کو یقین دلایا کہ تحقیقات کی جائیں گی اور سخت کارروائی کی جائے گی۔ چیئرمین نے ہدایت کی کہ انکوائری کے دوران افسر کو معطل کیا جائے تاکہ شفافیت اور غیر جانبداری یقینی بنائی جا سکے۔پمز میں برن سینٹر سے متعلق مسائل پر بھی بات چیت ہوئی۔ تمام سٹیک ہولڈرز کی سماعت کے بعد چیئرمین نے وفاقی وزیر برائے صحت کو ہدایت کی کہ وہ اس معاملے کا جائزہ لیں اور خوش اسلوبی سے حل کریں اور زور دیا کہ پمز ایک قومی اثاثہ ہے جس کی حفاظت ضروری ہے۔

کمیٹی نے پمز اور SZAMBU کے ڈینٹل ہسپتال سے متعلق سفارشات کی تعمیل کی صورتحال کا مزید جائزہ لیا اور بتایا کہ مسائل کمیٹی کی ہدایات کے مطابق حل ہو گئے ہیں۔ چیئرمین نے ہدایت کی کہ پمز ایکٹ 2023 کے تحت اس مسئلے کو حل کیا جائے۔کمیٹی کو حکومت کی مقامی ویکسین پیداوار کے لئے مختلف ممالک خاص طور پر سعودی عرب کے تعاون سے بھی بریفنگ دی گئی۔ ان کوششوں کی تعریف کرتے ہوئے کمیٹی نے قومی مفاد میں اپنی مکمل حمایت کا یقین دلایا۔

اجلاس میں سینیٹر سید مسرور احسن، سینیٹر راحت جمالی، سینیٹر ڈاکٹر زرقا سہروردی تیمور اور سینیٹر سرمد علی نے شرکت کی جبکہ سینیٹر انوشہ رحمان احمد خان نے زوم کے ذریعے شرکت کی۔آخر میں چیئرمین نے اسلام آباد میں پی آئی ایم ایس، پولی کلینک ہسپتال اور دیگر سرکاری صحت کے اداروں کی نگرانی کے لئے ایک ویجیلنس کمیٹی کے قیام کا اعلان کیا تاکہ عوامی شکایات کو حل کیا جا سکے۔ کمیٹی کی قیادت سینیٹر مسرور احسن، سینیٹر راحت جمالی، سینیٹر ثمینہ ممتاز زہری اور سینیٹر انوشہ رحمان احمد خان کریں گے۔ وفاقی وزیر نے اس اقدام کا خیرمقدم کیا اور مکمل تعاون کی یقین دہانی کرائی۔