شہید کانسٹیبل عرفان ارشد کو پورے اعزاز کے ساتھ سپرد خاک کر دیا گیا

اسلام آباد۔14جون (اے پی پی):اسلام آباد کیپیٹل ٹیریٹری (آئی سی ٹی) پولیس کانسٹیبل عرفان ارشد کی نماز جنازہ پولیس لائنز ہیڈ کوارٹرز اسلام آباد میں ادا کر دی گئی جس میں اعلیٰ پولیس افسران اور اہلکاروں نے شرکت کی۔اتوار کو پولیس حکام نے ’’اے پی پی ‘‘ کو بتایا کہ انسپکٹر جنرل پولیس (آئی جی پی) سید علی ناصر رضوی سمیت اسلام آباد پولیس کے افسران اور اہلکاروں کی بڑی تعداد نے نماز جنازہ میں شرکت کی۔

مرحوم کی روح کے ایصال ثواب اور بلندی درجات کے لیے خصوصی دعا کی گئی۔آئی جی نے سوگوار خاندان سے دلی تعزیت کا اظہار کیا اور پولیس فورس کے لیے شہید کانسٹیبل کی خدمات کو خراج عقیدت پیش کیا۔ انہوں نے اہل خانہ کو یقین دلایا کہ اسلام آباد پولیس اس مشکل وقت میں ان کے ساتھ کھڑی رہے گی اور ہر ممکن تعاون اور مدد فراہم کرے گی۔

اسلام آباد پولیس اپنے اہلکاروں اور ان کے اہل خانہ کی فلاح و بہبود کے لیے پرعزم ہے اور جاں بحق کانسٹیبل کے اہل خانہ کی مدد جاری رکھے گی۔سینئر افسران اور ساتھیوں نے بھی مرحوم کی روح کے لیے دعا کی اور سوگوار خاندان کے ساتھ اظہار یکجہتی کیا۔