صدر آزاد جموں و کشمیر سردار محمد مسعود خان کا برطانوی پارلیمنٹ کے ایوان بالامیں منعقدہ کشمیر سیمینار سے خطاب

اسلام آباد ۔ 06 جولائی (اے پی پی) صدر آزاد جموں و کشمیر سردار محمد مسعود خان نے کہا ہے کہ کشمیری قوم کے حق خود ارادیت کے حصول کےلئے جدوجہد انصاف، عالمی قوانین، جمہوری اقدار اور اقوام متحدہ کے چارٹر کے مطابق ہے، ہم کسی سے بھیک نہیں مانگتے ہیں، نہ کوئی رعایت ، مقبوضہ کشمیر کی اندوہناک صورتحال پر عالمی برادری کے بے حسی اور خاموشی افسوسناک ضرور ہے لیکن ہم مایوس نہیں ، کشمیریوں کے حوصلے بلند ہیں بھارتی مظالم پر خاموش نہیں رہ سکتے، ہم اپنی جدوجہد جاری رکھیں گے، برطانیہ عالمی قوانین، جمہوری اقدار اور انسانیت پر یقین رکھنے والا ملک ہے، برطانوی پارلیمنٹ کے ارکان اپنی عالمی ذمہ داریاں پوری کریں اور کشمیری مسلمانوں کی نسل کشی رکوانے اور حق خود ارادیت دلانے کے لیے اپنا موثر کردار ادا کریں۔ یہاں جاری پریس ریلیز کے مطابق وہ برطانوی پارلیمنٹ کے ایوان بالا( ہاﺅس آف لارڈز) میں منعقدہ کشمیر سیمینار سے خطاب کر رہے تھے جس میں برطانوی پارلیمنٹ کے دونوں ایوانوں کے 24 ارکان نے شرکت کی ۔ صدر مسعود خان نے کہا کہ برطانوی پارلیمنٹ انسانی حقوق کی محافظ اور علمبردار ہے ۔ سلامتی کونسل کا مستقل رکن ہونے کے ناطے عالمی امن و سلامتی بھی برطانیہ کی ذمہ داری ہے ۔ مسئلہ کشمیر برطانوی قانون آزادی ہند 1947 ءکے ایجنڈے کا نا مکمل حصہ ہے ۔ جس جذبے کے تحت برطانیہ نے ہندوستان اور پاکستان کو آزادی دے کر دو ملک بنائے تھے ۔ اِسی اصول کے تحت کشمیریوں کو اقوام متحدہ کی قرار دادوں کی روشنی میں حق خود ارادیت دلانے کے لیے بھی برطانوی حکومت اپنا اثر و سوخ استعمال کرے ۔