صدر مملکت ممنون حسین کی چینی وزیر سائنس وٹیکنالوجی گانگ وان سے گفتگو

اسلام آباد ۔ 8 جولائی (اے پی پی) صدر مملکت ممنون حسین نے کہا ہے کہ سی پیک سے متعلق توانائی کے منصوبوں میں جدید ٹیکنالوجی کا استعمال ملک کی طویل مدتی ترقی اور استحکام کیلئے اہم کردار ادا کرے گا۔وہ سائنس وٹیکنالوجی کے بارے میں چین کے وزیر گانگ وان سے باتیں کر رہے تھے۔جنہوں نے ہفتہ کو یہاں ایوان صدر میں ان سے ملاقات کی،وفاقی وزیر سائنس و ٹیکنالوجی رانا تنویر حسین اور دیگر اعلی حخام بھی اس موقع پر موجود تھے۔ صدر مملکت نے کہا کہ دونوں ملکوں کے مابین سائنس و ٹیکنالوجی کے شعبہ میں دو طرفہ تعاون میں مثبت پیشرفت جاری ہے اور حالیہ دورہ کے موقع پر کئے گئے فیصلوں پر عملدرآمد سے اس اہم شعبہ میں تعاون کو مزید فروغ ملے گا۔انہوں نے کہا کہ سائنسی علم اور ٹیکنالوجی سی پیک منصوبوں میں بہتری لائے گا اور پاکستان ملکی طور پر خام مال کی تیاری اور تیارشدہ مصنوعات کو مزید بہتربنانے کیلئے اس علم سے مستفید ہونے کا خواہش مند ہے۔صدر نے کہا کہ چین پاکستان اقتصادی راہداری اقتصادی تعاون کی بہترین مثال ہے۔