فرانس میں احتجاج جاری ، صدر کی مظاہرین سے پرامن رہنے کی اپیل

پیرس۔19اکتوبر (اے پی پی):فرانس میں پھوٹنے والی احتجاج کی لہر کے دوران صدر ایمانوئیل میکخواں نے عوام کو پرامن رہنے کی اپیل کی ہے۔رائٹرز کے مطابق ملک کی تاریخ کے بدترین ہنگامے ہوئے جن کے دوران ہزاروں افراد کو گرفتار کیا گیا، مظاہروں میں دکانوں کو لوٹا گیا جبکہ دوسری املاک کو بھی نقصان پہنچایا گیا۔احتجاج کا یہ سلسلہ مہنگائی اور عوامی کو ملنے والی سروسز میں کمی کے خلاف شروع ہوا ہے۔

فرانسیسی صدر ایمانوئیل میکخواں نے قوم سے خطاب میں کہا کہ یہ مناظر دیکھ کر ہم سوچ رہے ہیں کہ ان کے ذہنوں میں کیا چل رہا ہے، فرانسیسی شہری اپنے ملک کے ساتھ ایسا کیسے کر سکتے ہیں۔ان کے مطابق ان واقعات کا کوئی جواز نہیں، نہ ہی ان کو درست قرار دیا جا سکتا ہے، آجہم سب شرمندگی اور غصہ محسوس کر رہے ہیں۔صدر میکخواں کا یہ بھی کہنا تھا کہ ’پُرامن احتجاج کرنے والوں کے مطالبات جائز ہیں اور ان کا موازنہ ان لوگوں سے نہیں کرنا چاہیے جو توڑ پھوڑ اور بدامنی پھیلا رہے ہیں۔

دائیں بازو کے بعض سیاست دانوں کی جانب سے ملک میں ایمرجنسی لگانے کے مطالبات کے باوجود فرانسیسی صدر نے اس کا اعلان نہیں کیا۔تاہم انہوں نے کہا کہ حکومت ضرورت پڑنے پر حکام کو مظاہروں پر پابندی لگانے کا اختیار دے گی تاکہ سرکاری عمارتوں اور مقامی کاروباروں کو محفوظ رکھا جا سکے۔