فیفا نے ورلڈ کپ 2030 اور 2034 کے میڈیا حقوق کے لیے ٹینڈر کا باضابطہ آغاز کر دیا، پیشکشیں 19 نومبر تک طلب

زیورخ / واشنگٹن۔23اکتوبر (اے پی پی):فٹ بال کی عالمی باڈی (فیفا) نے امریکا اور پورٹو ریکو میں فیفا ورلڈ کپ 2030 کے میڈیا حقوق کی فروخت کے لیے انویٹیشن ٹو ٹینڈر (آئی ٹی ٹی) جاری کر دیا ہے، جس میں دلچسپی رکھنے والے نشریاتی اداروں کو فیفا ورلڈ کپ 2034 کے حقوق بھی حاصل کرنے کا اختیار دیا گیا ہے۔فیفا کمیونیکیشن ڈویژن کے مطابق یہ اقدام امریکامیں فیفا ورلڈ کپ 2026 کی تاریخی کامیابی اور ریکارڈ ساز ناظرین کے بعد اٹھایا گیا ہے۔ 2026 کے ایونٹ کے دوران 39 دنوں پر مشتمل 104 میچز میں لکیری اور سٹریمنگ پلیٹ فارمز پر فی میچ ناظرین کی اوسط 13.5 ملین رہی، جو قطر ورلڈ کپ 2022 کے مقابلے میں 166 فیصد زیادہ تھی۔

اس کے علاوہ امریکی ٹیم کے ہر میچ کو 20 ملین سے زائد ناظرین نے دیکھا، جبکہ فائنل میچ اوسطاً 63 ملین ناظرین کے ساتھ امریکی تاریخ کا سب سے زیادہ دیکھا جانے والا فٹ بال میچ ثابت ہوا۔فیفا کے سیکرٹری جنرل متیاس گرافستروم نے کہا کہ 2026 کا ورلڈ کپ شائقین کا ایونٹ تھا اور آئندہ دونوں ٹورنامنٹس اسی رفتار اور جوش و خروش کو آگے بڑھائیں گے۔ انہوں نے کہا کہ فیفا کو ایسے میڈیا پارٹنر کی تلاش ہے جو جدید تقاضوں کے مطابق شائقین تک میچز پہنچانے اور شمالی امریکامیں فٹ بال کی ترقی کے لیے پرعزم ہو۔واضح رہے کہ فیفا ورلڈ کپ 2030 مشترکہ طور پر مراکش، پرتگال اور سپین میں منعقد ہوگا، جبکہ 1930 کے پہلے ورلڈ کپ کے 100 سال مکمل ہونے کی مناسبت سے ارجنٹائن، پیراگوئے اور یوراگوئے میں ایک ایک نمائشی میچ کھیلا جائے گا۔

اسی طرح فیفا ورلڈ کپ 2034 کی میزبانی سعودی عرب کے سپرد کی گئی ہے۔ٹینڈر کے عمل میں حصہ لینے کے خواہش مند نشریاتی ادارے [email protected] پر رابطہ کر کے دستاویزات حاصل کر سکتے ہیں، جبکہ تجاویز جمع کرانے کی آخری تاریخ جمعرات 19 نومبر 2026، دن 12:00 بجے (ایسٹرن اسٹینڈرڈ ٹائم) مقرر کی گئی ہے۔ فیفا کے مطابق میڈیا رائٹس کی فروخت سے حاصل ہونے والی آمدنی دنیا بھر میں فٹ بال کے فروغ اور فیفا فارورڈ پروگرام کے لیے استعمال کی جائے گی۔