قطری شہزادے کے بیان کے بغیر جے آئی ٹی کی رپورٹ کو نامکمل سمجھا جائے گا‘طارق فضل چوہدری

پاناما لیکس کے مسئلے پر شریف خاندان نے پہلے دن ہی سے خود کو احتساب کے لیے پیش کیا‘ قطری شہزادے کے بیان کے بغیر جے آئی ٹی کی رپورٹ کو نامکمل سمجھا جائے گا‘طارق فضل چوہدری

اسلام آباد ۔ 09 جولائی (اے پی پی) وزیر مملکت برائے کیڈ ڈاکٹر طارق فضل چوہدری نے کہا ہے کہ پاناما لیکس کے مسئلے پر شریف خاندان نے پہلے دن ہی سے خود کو احتساب کے لیے پیش کیا ہے۔ اتوار کو ایک نجی ٹی وی چینل سے بات چیت کرتے ہوئے انہوں نے کہا کہ وزیراعظم محمد نواز شریف نے پہلے ہی سپریم کورٹ کو پاناما پیپرز معاملے کی شفاف تحقیقات کے لیے کمیشن بنانے کا خط لکھ دیا تھا۔ انہوں نے کہا کہ تحریک انصاف کے چیئرمین عمران خان نے پاناما معاملے پر سپریم کورٹ کے کمیشن کے بائیکاٹ کی دھمکی دی تھی۔ وزیر مملکت کا کہنا تھا کہ عمران خان صرف سیاسی پوائنٹ سکورنگ کے لیے پاناما پیپرز پر سیاست کر رہے ہیں۔ انہوں نے کہا کہ ہم مشترکہ تحقیقاتی ٹیم جے آئی ٹی کی تحقیقات کے طریقہ کار پر تحفظات کا اظہار کر کے اپنا آئینی حق استعمال کر رہے ہیں۔ ڈاکٹر طارق فضل چوہدری کا کہنا تھا کہ قطری شہزادہ قطر میں اپنے دفتر کے اندر جے آئی ٹی کو انٹرویو دینے کے لیے تیار تھا لیکن جے آئی ٹی اس سے گریزاں تھی جو سمجھ سے بالاتر ہے۔ انہوں نے کہا کہ قطری شہزادے کا بیان سب سے اہم ہے اس لیے قطری شہزادے کے بیان کے بغیر جے آئی ٹی کی رپورٹ کو نامکمل سمجھا جائے گا۔