مویشیوں میں واٹر ہارٹ کی خطرناک بیماری کی بروقت تشخیص اور چیچڑوں کے مؤثر کنٹرول سے ان کی جان بچائی جا سکتی ہے،ترجمان لائیو سٹاک

فیصل آباد۔ 27 اکتوبر (اے پی پی):واٹر ہارٹ مویشیوں، بھیڑوں اور بکریوں کو متاثر کرنے والی ایک خطرناک متعدی بیماری ہے، جو عموماً متاثرہ چیچڑوں کے کاٹنے سے پھیلتی ہے اور بروقت تشخیص و علاج نہ ہونے کی صورت میں جانوروں کی اچانک موت کا سبب بن سکتی ہے۔ترجمان لائیو سٹاک کے مطابق یہ بیماری Ehrlichia ruminantium نامی بیکٹیریا کے باعث پیدا ہوتی ہے، جو جانور کے جسم میں خون کی نالیوں کی اندرونی تہہ کو متاثر کرتا ہے، جس کے نتیجے میں جسم کے مختلف حصوں میں سیال جمع ہونے لگتا ہے۔ بیماری کی نمایاں علامات میں اچانک تیز بخار، بھوک کا ختم ہونا، سستی، سانس لینے میں دشواری، آنکھوں کی غیر معمولی حرکات، دانت پیسنا، لڑکھڑاتے ہوئے چلنا، چکر کاٹنا، پٹھوں میں جھٹکے اور اعصابی دورے شامل ہیں، جبکہ شدید متاثرہ جانور زمین پر گر سکتا ہے اور بعض صورتوں میں اچانک موت واقع ہو سکتی ہے۔انہوں نے بتایا کہ ا س بیماری کے دوران دل کے گرد سیال جمع ہونے کی کیفیت کو ہائیڈروپیری کارڈیم اور سینے میں سیال جمع ہونے کو ہائیڈروتھوریکس کہا جاتا ہے، تاہم ان اصطلاحات کو واٹر ہارٹ کا متبادل سمجھنے کے بجائے بیماری سے متعلق ممکنہ جسمانی پیچیدگیوں کے طور پر دیکھنا چاہیے۔ انہوں نے مزید بتایا کہ ظاہری علامات کی بنیاد پر بیماری کی حتمی تشخیص ممکن نہیں، اس لیے مشتبہ جانور کا فوری ویٹرنری معائنہ اور ضرورت پڑنے پر پی سی آر سمیت متعلقہ لیبارٹری ٹیسٹ کروانا ضروری ہے۔ بیماری کے ابتدائی مرحلے میں مناسب اینٹی بایوٹک، خصوصاً آکسی ٹیٹراسائکلین ، سے علاج مؤثر ثابت ہو سکتا ہے، تاہم دوا کی خوراک اور دورانیے کا تعین جانور کی نوع، وزن اور طبی حالت کے مطابق مستند ویٹرنری ڈاکٹرسے ہی کرواناچاہیے۔ انہوں نے کہا کہ واٹر ہارٹ سے بچاؤ کے لیے چیچڑوں کا مؤثر خاتمہ بنیادی اہمیت رکھتا ہے، جس کے لیے جانوروں کا باقاعدگی سے معائنہ، مناسب چیچڑ مار ادویات کا محفوظ استعمال اور جانوروں کے رہائشی مقامات کی صفائی ضروری ہے۔ انہوں نے کہا کہ اگر کسی جانور میں اچانک تیز بخار، سانس کی شدید تکلیف، اعصابی علامات یا غیر معمولی اموات سامنے آئیں تو فوری طور پر قریبی ویٹرنری ڈاکٹر یا محکمہ لائیو سٹاک سے رابطہ کیا جائے کیونکہ ایسی علامات دیگر خطرناک بیماریوں میں بھی ظاہر ہو سکتی ہیں۔