وائلڈ لائف پارک جوہرآبادمیں کالے ہرن کی کامیاب بریڈنگ ،جتوئی میں پرندوں کا غیر قانونی ڈیلر گرفتار

لاہور۔22جولائی (اے پی پی):وائلڈلائف پارک جوہر آباد میں نایاب کالے ہرن کی کامیاب افزائش نسل کے بعد سیاحوں کیلئے کالے ہرنوں کی تعداد 11ہوگئی جبکہ جتوئی سے جنگلی پرندوں کے ایک غیرقانونی ڈیلر سے25گانی دار طوطے برآمد کرکے اسے گرفتار کرلیاگیا ہے۔ترجمان کے مطابق محکمہ کے زیر انتظام وائلڈلائف پارک جوہر آباد میں انتظامیہ کی بہترین ایکس سیچو کنزرویشن کی بدولت نایاب کالے ہرنوں کی کامیاب افزائش نسل کا سلسلہ جاری ہے اور گزشتہ دو ماہ کے دوران کالے ہرنوں کے ہاں تین بچوں کی پیدائش ہوئی۔پارک انچارج اسسٹنٹ چیف وائلڈلائف رینجر سیدہ فریحہ شیراز ی کے مطابق وائلڈلائف پارک جوہر آباد میں پہلی دفعہ مارچ 2026 میں 6 مادہ اور 2نر کالے ہرن جلو وائلڈلائف پارک لاہور سے یہاں منتقل کئے گئے

جنہیں انتظامیہ نے مکمل آرام دہ ماحول میسر کیا جس کی وجہ سے اب یہاں کالے ہرنوں کی کامیاب بریڈنگ شروع ہو چکی ہے اور پچھلے ماہ جون میں 2 اور اب ایک نئے مہمان کا اضافہ ہوا ہے،جس سے اب یہاں شائقین کیلئے کالے ہرنوں کی تعداد 11ہو چکی ہے اور تمام زچہ وبچہ پر سکو ن ماحول میں سکونت پذیر ہیں،دوسری جانب اسسٹنٹ چیف وائلڈلائف رینجر مظفر گڑھ عبدالرحمان نے عدالت سے سرچ وارنٹ کے بعد تحصیل جتوئی سے جنگلی پرندوں کے ایک غیرقانونی ڈیلرکو گرفتار کرکے اس کے قبضہ سے 25گانی دار طوطے برآمد کرکے عدالتی حکم پرڈی جی خان زو منتقل کردیئے اور ملزم کیخلاف قانونی چارہ جوئی شروع کردی ہے۔