وزیراعظم محمد نواز شریف کا حویلی بہادر شاہ پاور پلانٹ کے 760 میگاواٹ کے پہلے یونٹ کے افتتاح کے بعد اجتماع سے خطاب

حویلی بہادر شاہ (جھنگ) ۔ 07 جولائی (اے پی پی) وزیراعظم محمد نواز شریف نے کہا ہے کہ پاکستان میں ہر شعبہ میں حقیقی معنوں میں انقلاب برپا ہو رہا ہے، پاکستان تبدیل ہو رہا ہے، وہ وقت دور نہیں جب پاکستان ترقی یافتہ ممالک کی صف اول میں شامل ہو گا، ملک و قوم کی خدمت کرکے اپنا فرض ادا کر رہے ہیں، ہمارے سیاسی مخالفین کو یہی تکلیف ہے کہ پاکستان ترقی کی بلندیوں کو چھونے جا رہا ہے، اندھیرے ختم ہو رہے ہیں، وہ انتخابی میدان میں تو ہمارا مقابلہ نہیں کر سکتے ، مسلم لیگ (ن) نے انتخابی میدان میں ان کو بار بار شکست دی ہے اور آئندہ بھی دے گی، وہ صرف سازشیں کرتے ہیں، کبھی دھاندلی کی آڑ میں، کبھی دھرنے کی آڑ میں اور کبھی احتساب کی آڑ میں سازش کی جاتی ہے اور کبھی وہ جے آئی ٹی کے پیچھے چھپنے کی کوشش کرتے ہیں، انتخابی میدان میں شکست کھا کر سازش کرنا بزدلی ہے۔ انہوں نے ان خیالات کا اظہار جمعہ کو یہاں حویلی بہادر شاہ پاور پلانٹ کے 760 میگاواٹ کے پہلے یونٹ کے افتتاح کے بعد اجتماع سے خطاب کرتے ہوئے کیا۔ وزیراعظم نے تختی کی نقاب کشائی کرکے منصوبہ کا افتتاح کیا جو 21 ماہ کی ریکارڈ مدت میں مکمل ہوا۔ وزیراعظم نے پلانٹ کے کنٹرول روم کا بھی دورہ کیا اور حویلی بہادر شاہ پاور پلانٹ کے سی ای او راشد محمود لنگڑیال نے منصوبہ کے بارے میں بریفنگ دی۔ وزیراعظم نے کہا کہ یہ بے حد خوشی کی بات ہے کہ منصوبہ سنگ بنیاد رکھنے کے محض 21 مہینوں کے بعد وہ یہاں آ کر اس کا افتتاح کر رہے ہیں، 21 ماہ پہلے منصوبہ کی جگہ کھیت اور میدان تھے، 21 ماہ میں اتنا بڑا منصوبہ مکمل ہونا ناقابل یقین ہے۔ انہوں نے کہا کہ اتنی مدت میں تو ایسے منصوبہ کا ایک حصہ بھی بننا مشکل ہوتا ہے، پاکستان میں منصوبوں کی تکمیل کی نئی روایت قائم کر رہے ہیں۔