وزیر خزانہ سینٹر اسحاق ڈار کی بینکوں کے چیف ایگزیکٹو افسران سے اجلاس کے بعد میڈیاسے گفتگو

اسلام آباد ۔ 06 جولائی (اے پی پی) وزیر خزانہ سینٹر اسحاق ڈار نے کہا ہے کہ ڈالر کی قیمت میں گزشتہ روز کے مصنوعی اضافے کی تحقیقات ہوں گی، روپے کے مقابلے میں ڈالر کی قیمتوں میں اضافے کی وجہ سیاسی حالات کی وجہ سے قیاس ارائیاں نہیں بلکہ اداروں اور افراد کے درمیان رابطوں کا فقدان ، غلط فہمی اور مصنوعی اقدام تھا ، گورنر سٹیٹ بینک کاتقرر وزیر اعظم کی وطن واپسی پر جلد کردیا جائے گا جس کے بعد اس معاملہ کی جامع تحقیقات ہوں گی کہ اس سے کس نے فائدہ اٹھایا اور کس کا نقصان ہوا، میرے سمیت کوئی بھی فرد انفرادی طور پر پاکستان کی معیشت کو نقصان پہنچانے کا حامل کوئی فیصلہ نہیں کرسکتا۔ ان خیالات کا اظہار انہوں نے جمعرات کو بینکوں کے چیف ایگزیکٹو افسران سے اجلاس کے بعد میڈیا سے گفتگوکرتے ہوئے کیا واضح رہے کہ وفاقی وزیر خزانہ اسحاق ڈار نے گذشتہ روز فنانس ڈویژن حکام کے ہنگامی اجلاس کے دوران مصنوعی طور پر ڈالر کے مقابلے میں پاکستانی روپے کی قدر میں کمی کا سخت نوٹس لیتے ہوئے اس صورتحال پر گہری تشوےش اور مایوسی کا اظہار کیا تھا۔