وزیر داخلہ چوہدری نثار علی خان سے فیس بک کے نائب صدر جوئیل کیپلان کی ملاقات

اسلام آباد ۔ 07 جولائی (اے پی پی) وزیر داخلہ چوہدری نثار علی خان سے جمعہ کو فیس بک کے نائب صدر جوئیل کیپلان نے ملاقات کی جس میں ایسے توہین آمیز اور گستاخانہ مواد کو ہٹانے کے حوالہ سے تبادلہ خیال کیا گیا جو پاکستان میں غیر قانونی ہے۔ وزیر داخلہ کی یہ ملاقات سوشل میڈیا سے گستاخانہ مواد کو ہٹانے اور اس سلسلہ میں اقدامات کے سلسلہ کی کڑی ہے۔ فیس بک نے اپنے پلیٹ فارم کو محفوظ بنانے اور اپنی کمیونٹی کے معیارات کے مطابق اقدار کو فروغ دینے کے اپنے عزم کا اعادہ کیا۔ فیس بک کے نائب صدر نے جعلی اکاﺅنٹس ختم کرنے، گستاخانہ، نفرت انگیز اور اکسانے والے مواد کو ہٹانے کا بھی وعدہ کیا جو دہشت گردی اور تشدد پر اکساتا ہے۔ وزارت داخلہ کے ترجمان نے ملاقات کی تفصیلات سے آگاہ کرتے ہوئے بتایا کہ یہ پہلا موقع ہے کہ فیس بک کی گلوبل پبلک پالیسی سے متعلق فیس بک انتظامیہ کے سینئر ممبر نے پاکستان کا دورہ کیا جس میں سوشل میڈیا بالخصوص فیس بک، جس کے پاکستان میں اس وقت 33 ملین استعمال کنندگان ہیں، کے غلط استعمال اور اس کے ذریعے گستاخانہ اور توہین آمیز مواد کے معاملہ پر بات چیت کی گئی۔ ترجمان کے مطابق وزیر داخلہ چوہدری نثار علی خان انٹرنیٹ خدمات مہیا کرنے والوں کے ساتھ بات چیت اور رابطوں کے ذریعے توہین آمیز اور گستاخانہ مواد کے مسئلہ کے حل کیلئے متحرک ہیں اور سوشل میڈیا کے غلط استعمال کے مسئلہ کا حل تلاش کرنے کے مسئلہ کا حل چاہتے ہیں۔ اس سلسلہ میں مارچ میں انہوں نے اسلامی ممالک کے سفراءکے ساتھ بھی خصوصی ملاقات کی تھی تاکہ مسلم ممالک مل کر اس مسئلہ کے حل کیلئے لائحہ عمل وضع کر سکیں اور اسلام اور مقدس ہستیوں کی توہین اور ان کی شان میں آزادی اظہار رائے کے نام پر گستاخی کے پاگل پن کو روکا جا سکے۔