وزیر مملکت برائے اطلاعات و نشریات و قومی ورثہ مریم اورنگزیب کی نجی ٹی وی سے گفتگو

اسلام آباد ۔ 07 جولائی (اے پی پی) وزیر مملکت برائے اطلاعات و نشریات و قومی ورثہ مریم اورنگزیب نے کہا ہے کہرپورٹ جے آئی ٹی نے دینی ہے اور اس رپورٹ میں حمد بن جاسم کا بیان بھی جے آئی ٹی ہی نے ریکارڈ کرانا ہے‘ اگر جے آئی ٹی حمد بن جاسم کا بیان ریکارڈ نہیں کراتی تو اس میں مشکلات پاکستان مسلم لیگ (ن) کے لیے نہیں بلکہ خود جے آئی ٹی کے لیے ہیں‘ حمد بن جاسم کو جو آپشنز آج دئیے جا رہے ہیں وہ انہیں پہلے کیوں نہیں دئیے گئے اب تو آخری 2دن ہی میں یہ آپشنز کیوں دئیے جا رہے ہیں، اگر کسی کو تحقیقات یا کچھ اور چاہیئے تھا تو پہلے ہی ہفتے یہ سب کچھ کر لیا جاتا تاکہ اب تک سارا معاملہ حل ہو چکا ہوتا اور ہم اس بحث ہی میں نہ پڑتے‘جے آئی ٹی کے متنازعہ ہونے کی بات آزاد میڈیا نے بھی اٹھائی ہے‘ حسین نواز نے سپریم کورٹ میں ایک پٹیشن کے ذریعے آئین و قانون کے راستے کو اختیار کرتے ہوئے جے آئی ٹی کے متعلق اپنے تمام تحفظات کو ریکارڈ کروایا‘سپریم کورٹ کو شریف خاندان کے تمام تحفظات کا نوٹس لینا چاہیئے جو ہمارا قانونی حق بھی ہے‘تیسری مرتبہ منتخب ہونے والے وزیراعظم محمد نواز شریف نے آئین و قانون کی پاسداری اور پاکستانی عوام کے اعتماد کے لیے اپنے اوپر لگنے والے جھوٹے الزامات پر خود کو اور اپنے خاندان کو احتساب کیلئے پیش کیا ‘ جے آئی ٹی کی تشکیل پر اور تمام تر تحفظات کے باوجود وزیراعظم محمد نواز شریف نے اسے چیلنج نہیں کیا کیونکہ یہ تاثر دیا جا رہا تھا کہ وزیراعظم محمد نواز شریف کسی طرح بھی احتساب سے بھاگنے کی کوشش کر رہے ہیں حالانکہ ایسا ہرگز نہیں تھا‘ وزیراعظم محمد نواز شریف وہ شخص ہیں جن کے خلاف تاریخ میں بھی سازشیں ہوئیں جو پوری عوام کے سامنے ہیں‘ یہ سازشیں پاکستان مخالف بیرونی طاقتیں اندرونی لوگوں کے ساتھ مل کر کرتی ہیں جن سے پاکستان کی ترقی و خوشحالی برداشت نہیں ہوتی۔ان خیالات کا اظہار انہوں نے جمعہ کو ایک نجی ٹی وی چینل سے بات چیت کرتے ہوئے کیا۔